ពោធិ៍សាត់ ៖ លោកយាយម្នាក់ដើរលើដងផ្លូវត្រូវរថយន្តមិនស្គាល់អត្តសញ្ញាណបុកបណ្ដាលឲ្យស្លាប់ភ្លាមៗនៅកន្លែងកើតហេតុ ។ ករណីនេះកើតឡើងនៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ២១៨-២១៩ ស្ថិតនៅភូមិស្វាយស ឃុំស្វាយដូនកែវ ស្រុកបាកាន ខេត្តពោធិ៍សាត់ កាលពីថ្ងៃព្រហស្បតិ៍៨រោច ខែអាសាឍ ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី២១ ខែកក្កដា ឆ្នាំ២០២២ វេលាយប់រំលងអធ្រាត្រ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញមានរថយន្ត០១គ្រឿង(មិនស្គាល់ម៉ាក) បានបើកមកដល់ចំណុចកើតហេតុខាងលើបានបុកចំលោកយាយម្នាក់ដែលកំពុងដើរលើដងផ្លូវយ៉ាងពេញទំហឹង បណ្ដាលឲ្យស្លាប់ភ្លាមៗនៅកន្លែងកើតហេតុ ។
ជនរងគ្រោះឈ្មោះ ចាន់ ប៉ុច អាយុ៩៦ឆ្នាំ ភេទស្រី មានទីលំនៅភូមិព្រៃយាង ឃុំអូរតាប៉ោង ស្រុកបាកាន ខេត្តពោធិ៍សាត់ ។ បន្ទាប់ពីកើតហេតុ ភាគីរថយន្តបានបានបើករត់គេចខ្លួនបាត់ ។ ចំពោះសាកសពសមត្ថកិច្ចបានធ្វើកំណត់ហេតុប្រគល់ឲ្យបងប្អូនសាច់ញ្ញាតិយកទៅធ្វើបុណ្យតាមប្រពៃណី។
លោកវរសេនីយ៍ឯក នាង វុធ អធិការនគរបាលស្រុកបាកានបានឲ្យដឹងថា បន្ទាប់ពីកម្លាំងនគរបាលជំនាញចរាចរណ៍បានចុះទៅពិនិត្យ និងធ្វើការវាស់វែងរួចហើយបានសន្និដ្ឋានថាករណីគ្រោះថ្នាក់ចរាចរណ៍នេះបណ្ដាលមកពីកត្តាល្បឿន អ្នកបើកបររថយន្តខ្វះការប្រុងប្រយ័ត្ន និងដោយស្ត្រីវ័យចំណាស់មានស្មារតីវង្វេងដើរចេញពីផ្ទះផងដែរ ៕
ប្រភព៖ អគ្គស្នងការដ្ឋាននគរបាលជាតិ
