បាត់ដំបង ៖ នៅថ្ងៃទី០៧ ខែកក្កដា ឆ្នាំ២០២២ វេលាម៉ោងប្រមាណជាង១១អធ្រាត្រ មានករណីលួចកាត់ខ្សែភ្លើងនៅម្តុំក្រុមទី០៣ ភូមិឆាយបល្ល័ង្គ ឃុំធិបតី ស្រុកគាស់ក្រឡ ខេត្តបាត់ដំបង ដែលក្រុមជនសង្ស័យលួចកាត់ផ្តាច់យកខ្សែភ្លើងរបស់ឈ្មោះ ផា ផាន ភេទប្រុស អាយុ៧៣ឆ្នាំ រស់នៅក្នុងមូលដ្ឋានខាងលើ ។
ភ្លាមៗជនរងគ្រោះបានផ្តល់ព័ត៌មានជាបឋមមកសមត្ថកិច្ចនគរបាលមូលដ្ឋានអំពីករណីនេះ។ ទទួលបានព័ត៌មាន និងស្របតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងទទួលផែនការងារនគរបាលព្រហ្មទណ្ឌ ករណីនេះត្រូវបានផ្តល់ទៅសមត្ថកិច្ចក្នុងមូលដ្ឋាន និងសមត្ថកិច្ចដែលមានភូមិសាស្ត្រជាប់គ្នាដើម្បីពិនិត្យតាមដាននិងស្រាវជ្រាវ ។
លុះដល់វេលាម៉ោងប្រមាណ១២រំលងអធ្រាត្រ កម្លាំងល្បាតនៃអធិការដ្ឋាននគបាលស្រុកបាណន់បានប្រទះមុខសញ្ញាចំនួន ០៣នាក់ កំពុងធ្វើដំណើរដោយម៉ូតូមួយគ្រឿង ឆ្លងកាត់ពីភូមិសាស្ត្រ ស្រុកគាស់ក្រឡ ចូលក្នុងភូមិសាស្ត្រស្រុកបាណន់ ។ ដោយស្ថានភាពគួរឱ្យសង្ស័យ សមត្ថកិច្ចបានឃាត់ឆែកឆេរឃើញខ្សែភ្លើងដែលគេទើបនឹងលួចកាត់បាននៅជាប់ជាមួយផង ដូច្នេះសមត្ថកិច្ចធ្វើការឃាត់ខ្លួនសាកសួរតែម្តង ។
ពេលសាកសួរពួកគបានឆ្លើយសារភាពថា គេពិតជាបានធ្វើសកម្មភាពលួចកាត់ខ្សែភ្លើងនៅមូលដ្ឋានស្រុកគាស់ក្រឡប្រាកដមែន ។
ជនសង្ស័យទាំង ០៣នាក់នោះ ១.ឈ្មោះ គិត លីម៉េង ភេទ អាយុ១៩ឆ្នាំ រស់នៅភូមិតាថុក ឃុំធិបតី ស្រុកគាស់ក្រឡ ខេត្តបាត់ដំបង ២.ឈ្មោះ យ៉ាន់ សៅសុវណ្ណរាជ ភេទប្រុស អាយុ១៥ឆ្នាំ មានទីលំនៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង (អនីតិជន) និង៣.ឈ្មោះ សៀន គឹមរ៉េវុន ភេទប្រុស អាយុ១៤ឆ្នាំមានទី លំនៅភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង (អនីតិជន)។
វត្ថុតាងដកហូតមាន៖ -ម៉ូតូឌ្រីម ពណ៌ក្រហម C១០០ ចំនួន ០១គ្រឿង -ខ្សែភ្លើងចំនួន ០៩កំណាត់ មានទម្ងន់សរុបចំនួន ២២,១៣គីឡូក្រាម -មួកសុវត្ថិភាពចំនួន ០១ -ដំបងឈើជ្រុងចំនួន ០១ -កាំបិតតាំងតោចំនួន ០១ -ពូថៅចំនួន ០១ -ទួណឺវីសចំនួន ០១ ។
លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានបញ្ជាក់ថា ដោយសារករណីនេះអង្គហេតុកើតនៅមូលដ្ឋានស្រុកគាស់ក្រឡ ទើបសមត្ថកិច្ចរបស់លោកប្រគល់មុខសញ្ញាទាំង ៣នាក់ និងវត្ថុតាងជូនទៅអធិការដ្ឋាននគរបាលស្រុកគាស់ក្រឡចាត់ការបន្ត។ បច្ចុប្បន្ន នគរបាលស្រុកគាស់ក្រឡរៀបចំសំណុំរឿងបញ្ជូនជនសង្ស័យ និងវត្ថុតាងមកកាន់ការិយាល័យជំនាញខេត្ត ដើម្បីអនុវត្តបន្តតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
