បាត់ដំបង៖ នៅថ្ងៃទី០៥ ខែកក្កដា ឆ្នាំ២០២២ វេលាម៉ោង១៨និង៣០០នាទី ត្រង់ចំណុចក្រុមទី០៨ ភូមិជ្រោយម្ទេស ឃុំតាម៉ឺន ស្រុកថ្មគោល ខេត្តបាត់ដំបង មានករណីបទហិង្សាដោយចេតនាមានស្ថានទម្ងន់ទោស (កាប់ដោយកាំបិត) មួយកើតឡើងដែលករណីនេះបង្កដោយជនសង្ស័យ ០១នាក់ឈ្មោះ សេង សារុន ភេទប្រុស អាយុ៤៧ឆ្នាំ រស់នៅភូមិជ្រោយម្ទេស ឃុំតាម៉ឺន ស្រុកថ្មគោល ខេត្តបាត់ដំបង បានធ្វើសកម្មភាពយកកាំបិតតាំងតោកាប់ទៅលើជនរងគ្រោះ ០១នាក់ឈ្មោះ ចាន់ សារ៉េត ភេទប្រុស អាយុ៦២ឆ្នាំ រស់នៅភូមិជ្រោយម្ទេស ឃុំតាម៉ឺន ស្រុកថ្មគោល ខេត្តបាត់ដំបង ជាច្រើនកាំបិត បណ្ដាលឱ្យរងរបួសត្រង់ក្បាល ផ្នែកខាងលើ និងផ្នែកខាងក្រោយលើខ្នងដៃខាងឆ្វេង និងកំភួនដៃចំហៀងខាងឆ្វេង។ នៅពេលកើតហេតុភ្លាបៗ អ្នកជិតខាងបាននាំជនរងគ្រោះទៅសង្ក្រោះនៅមន្ទីរពេទ្យ ហើយព័ត៌មាននេះបានដឹងដល់សមត្ថកិច្ចនគរបាលមូលដ្ឋាន។
អនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទ័ណ្ឌ លោកវរសេនីយ៍ទោ សេង លុច អធិការនគរបាលស្រុកថ្មគោល បានដឹកនាំកម្លាំងជំនាញធ្វើការស្រាវជ្រាវរហូតឃាត់ខ្លួនជនសង្ស័យខាងលើបាននិងដកហូតវត្ថុតាងមានកាំបិតតាំងតោផ្លែដែកដងឈើចំនួន០១ ដែលជនសង្ស័យប្រើប្រាស់ក្នុងអំពើល្មើសនេះរួចនាំមកធ្វើការសាកសួរនៅអធិកាតដ្ឋាននគរបាលស្រុក។ លោកវរសេនីយ៍ទោ សេង លុច បានបញ្ជាក់ថាតាមចម្លើយសារភាពរបសលជនសង្ស័យថា មូលហេតុដែលជនសង្ស័យប្រើហិង្សាបែបនេះទៅលើជនរងគ្រោះ គឺដោយសារតែកន្លងមកជនរងគ្រោះធ្វើសំណង់បន្ទប់ទឹកនៅផ្ទះរបស់គាត់ ហើយជួលជនសង្ស័យនេះមកធ្វើសំណង់នោះត្បិតជនសង្ស័យនេះជាជាងសំណង់។
ដោយសារតែការធ្វើការងាររបស់ជាងនេះ បាត់ឃើញៗហើយសំណង់ទុកចោលមិនធ្វើឱ្យរួចរាល់ ទើបម្ចាស់សំណងជាជនរងគ្រោះបញ្ឈប់មិនឱ្យជនសង្ស័យធ្វើការងារនេះបន្តទៀត។ ដោយមានកំហឹងបែបនេះហើយទើបនៅថ្ងៃកើតហេតុខាងលើ ជនសង្ស័យបានយកកាំបិតតាំងតោកាប់ទៅលើជនរងគ្រោះជាច្រើនកន្លែងបណ្តាលឱ្យរងរបួសធ្ងន់ធ្ងរតែម្តង។ ករណីនេះ សមត្ថកិច្ចបានរៀបចំសំណុំរឿងបញ្ជូនជនសង្ស័យរួមនិងវត្ថុតាងមកកាន់ការិយាល័យជំនាញនៃស្នងការដ្ឋាននគរបាលខេត្ត ដើម្បីអនុវត្តបន្តតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ
