បាត់ដំបង៖ កាលពីម៉ោងប្រមាណ ១១:៣០នាទីថ្ងៃត្រង់ ត្រូវនឹងថ្ងៃទី២៧ ខែមិថុនា ឆ្នាំ២០២២ មានករណីគ្រោះថ្នាក់ចរាចរណ៍មួយបានកើតឡើងនៅតាមណ្តោយផ្លូវជាតិលេខ៥ ស្ថិតក្នុងក្រុមទី៦ ភូមិកកោះ ឃុំកកោះ ស្រុកមោងឫស្សី ខេត្តបាត់ដំបង ដោយរថយន្តដឹកទំនិញមួយគ្រឿងបានបុកជាមួយរថយន្តក្រុង បណ្តាលអោយក្មេងប្រុសម្នាក់បានស្លាប់ និងមានមនុស្សជាច្រើនទៀតរងរបួសធ្ងន់ស្រាល។
បើយោងតាមប្រភពពីកន្លែងកើតហេតុបានអោយដឹងថាថា នៅមុនពេលកើតហេតុគេឃើញរថយន្តក្រុងធុនធំមួយគ្រឿងម៉ាកគារ ពណ៍ក្រហម ពាកស្លាកលេខ ភ្នំពេញ ៣D-៣៨៣៨ ដែលបើកបរដោយឈ្មោះ យ៉ន គ្រើន ភេទប្រុស អាយុ ៣៦ឆ្នាំ រស់នៅភូមិសេរីកាកែវ ឃុំសេរីកាកែវ ស្រុកល្វាឯម ខេត្តកណ្តាល ដោយដឹកភ្ញៀវពេញធ្វើដំណើរក្នុងទិសដៅពីលិចទៅកើត (បាត់ដំបង ភ្នំពេញ) ស្រាប់តែមកដល់ចំណុចកើតហេតុ ក៏មានរថយន្តដឹកទំនិញមួយគ្រឿងម៉ាក ហ៊ីយ៉ាន់ដាយ ពណ៍ស ពាកស្លាកលេខបាត់ដំបង ៣A-២០៧៩ ក្នុងទិសដៅផ្ទុយគ្នា ហើយបានរ៉េចង្កូតទៅបុករថយន្តក្រុងពេញទំហឹង បណ្តាលអោយក្រឡាប់ផ្ងាជើងខ្ទេចទាំងសងខាង។ នៅក្នុងហេតុការណ៍ដ៏រន្ធត់នេះ បានបណ្តាលអោយយក្មេងប្រុសម្នាក់ដែលជិះលើរថយន្តក្រុង បានស្លាប់ និងមនុស្សជាច្រើននាក់ផ្សេងទៀតរងរបួសធ្ងន់និងស្រាល នឹងត្រូវបានបញ្ជូនទៅសង្គ្រោះព្យាបាលនៅឯមន្ទីរពេទ្យ។
ក្រោយពេលកើតហេតុសមត្ថកិច្ចជំនាញបានចុះទៅធ្វើការយវាស់វែង និងបាននាំយករថយន្តទាំង ២គ្រឿង ទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្ត ដើម្បីទុកធ្វើការដោះស្រាយនៅពេលក្រោយតាមនិតិវិធីច្បាប់៕
