បន្ទាយមានជ័យ ៖ សមត្ថកិច្ចនគរបាលក្រុងប៉ោយប៉ែតបានបង្ក្រាបមុខសញ្ញាឆក់ទូរស័ព្ទយ៉ាងសកម្ម នៅក្រុងប៉ោយប៉ែត ឃាត់ខ្លួនបាន០៧នាក់ (ស្រី០១នាក់)ជាបន្តបន្ទាប់ និងអ្នកទទួលទិញផលចោរកម្ម ២នាក់ (ស្រី០១នាក់) បញ្ជូនទៅសាលាដំបូងខេត្តចាត់ការតាមនីតិវិធី ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា បន្ទាប់ពីទទួលព័ត៌មានថា នៅយប់ថ្ងៃទី០៥ ខែមិថុនា ឆ្នាំ២០២២ វេលាម៉ោង២៤និង៤០ នាទី ឈានចូល ថ្ងៃទី០៦ ខែមិថុនា ឆ្នាំ២០២២ មានមុខសញ្ញាជនសង្ស័យ០២នាក់ជិះម៉ូតូ០១គ្រឿង បានឆក់យកទូរសព្ទដៃរបស់អ្នកដំណើរ ម៉ាក IPhone12pro Max ពណ៌ទឹកសមុទ្រ ខណៈជនរងគ្រោះឈ្មោះ ហូបាងថាញ់ (HO BANG THANH) ភេទស្រី អាយុ៣២ឆ្នាំ ជាជនជាតិវៀតណាម ស្នាក់នៅបុរីដួងច័ន្ទ ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ជិះផាស្អាប់ចេញពីបុរីដួងច័ន្ទ ទៅខារ៉ាអូខេអេហ្វផា្លស បណ្តាលឲ្យជនរងគ្រោះធ្លាក់រងរបួសបែកមុខ(ដេរជាច្រើនថ្នេរ) ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់បទបញ្ជាឲ្យលោកដឹកនាំកម្លាំងនគរបាលជំនាញ ចុះស្រាវជ្រាវតាមវិធានការជំនាញឈានដល់ការនាំខ្លួនឈ្មោះ សឿន ពិសី ភេទប្រុស អាយុ២៦ឆ្នាំ ស្នាក់នៅភូមិមិត្តភាព សង្កាត់/ក្រុងប៉ោយប៉ែត ខេត្តបន្ទាយមានជ័យ ជាអ្នកទទួលទិញផលចោរកម្ម មកសួរនាំដកហូតទូរស័ព្ទបាន២គ្រឿងរបស់ជនរងគ្រោះប្រគល់ជូនម្ចាស់វិញ ។
លោកអធិការបានបន្តថា ក្រោយពីសួរនាំអ្នកទទួលទិញផលចោរកម្ម កម្លាំងផ្នែកជំនាញបានបន្តឃាត់ខ្លួនមុខសញ្ញាចោរឆក់ចំនួន០៨នាក់ទៀត ។ ក្នុងនោះបានដកហូតម៉ូតូជិះធ្វើសកម្មភាពចំនួន៤គ្រឿងក្នុងនោះc125 ពណ៌ខ្មៅ២គ្រឿង អឹមស្លះ១គ្រឿង និងMSXមួយគ្រឿង កាំបិតចំនួន៥ដើម សាម៉ូរ៉ៃ ៣ដើម និងកាំបិតខ្វែវ ២ដើម ។
លោកវរសេនីយ៍ឯក សៅ សារឿន បានបញ្ជាក់ទៀតថា៖ ជនសង្ស័យរួមទាំងវត្ថុតាងម៉ូតូ០៤គ្រឿង ជិះធ្វើសកម្មភាព និងកាំបិតចំនួន០៥ដើម កម្លាំងផ្នែកជំនាញ រៀបចំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីចាត់ការតាមនីតិវិធីច្បាប់ ។ ដោយឡែកទូរស័ព្ទដៃរបស់ជនរងគ្រោះបានប្រគល់ជូនម្ចាស់ដើមវិញផងដែរ ៕
ប្រភព៖ អគ្គស្នងការដ្ឋាននគរបាលជាតិ
