បាត់ដំបង ៖ នៅថ្ងៃទី២៤ ខែឧសភា ឆ្នាំ២០២២ វេលាម៉ោង១១និង២០នាទី ត្រង់ចំណុចក្រុមទី០៧ ភូមិតាហែន១ ឃុំរកា ស្រុកសង្កែ ខេត្តបាត់ដំបង មានករណីហិង្សាដោយចេតនាមានស្ថានទម្ងន់ទោស ១កើតឡើង បង្កដោយជនសង្ស័យម្នាក់ឈ្មោះ ហឿន ជាតិ ភេទប្រុស អាយុ៤០ឆ្នាំ មានទីលំនៅភូមិតាហែន១ ឃុំរកា ស្រុកសង្កែ ខេត្តបាត់ដំបង បានយកខ្នងពូថៅវាយទៅលើជនរងគ្រោះឈ្មោះ អ៊ិត សុភុនវាសនា ភេទប្រុស អាយុ៤៣ឆ្នាំ ស្នាក់នៅភូមិតាហែន១ ឃុំរកា ស្រុកសង្កែ ខេត្តបាត់ដំបង បណ្តាលអោយរងរបួសភ្នែកខាងឆ្វេងចេញឈាម។
ករណីនេះ ដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាយោបល់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ លោកវរសេនីយ៍ឯក ស៊ុន សុវណ្ណ អធិការនគរបាលស្រុកសង្កែ បានដឹកនាំកម្លាំងក្នុងអង្គភាពបង្ក្រាបឃាត់ខ្លួនជនសង្ស័យឈ្មោះ ហឿន ជាតិ ភេទប្រុស អាយុ៤០ឆ្នាំ មានទីលំនៅភូមិតាហែន១ ឃុំរកា ស្រុកសង្កែ ខេត្តបាត់ដំបង នៅវេលាម៉ោង១៦និង០០នាទី ថ្ងៃទី២៤ ខែឧសភា ឆ្នាំ២០២២។ ក្រោយឃាត់ខ្លួនជនសង្ស័យបានឆ្លើយសារភាពថា ខ្លួនពិតជាបានយកខ្នងពូថៅវាយទៅលើជនរងគ្រោះរហូតមានរបួសពិតប្រាកដមែន ក្រោមមូលហេតុផឹកស្រាស្រវឹងមានជម្លោះជាមួយគ្នា។
បច្ចុប្បន្ន កម្លាំងអធិការដ្ឋាននគរបាលស្រុកសង្កែកំពុងកសាងសំណុំបញ្ជូនទៅការិយាល័យជំនាញខេត្ត ដើម្បីអនុវត្តបន្តតាមនីតិវិធី៕
ប្រភព៖ អគ្គស្នងការដ្ឋាននគរបាលជាតិ
