បាត់ដំបង ៖ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ នៅព្រឹកថ្ងៃទី ៥ ខែឧសភា ឆ្នាំ២០២២ លោកវរសេនីយ៍ទោវេ គឹមចត់ អធិការនគរបាលស្រុកកំរៀង បានដឹកនាំកម្លាំងផ្នែកជំនាញធ្វើការស្រាវជ្រាវករណីចោរកម្ម(លួចម៉ូតូ) ។
ក្នុងប្រតិបត្តិការខាងលើ កម្លាំងបានធ្វើការឃាត់ខ្លួនជនសង្ស័យឈ្មោះ វុធ វីត ហៅពៅ ភេទប្រុស អាយុ២៧ឆ្នាំ មានទីលំនៅ ភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង មកកាន់អធិការដ្ឋាននគបាលស្រុកដើម្បីធ្វើការសាកសួរ ។ ដោយក្នុងនោះបានដកហូតម៉ូតូ០១គ្រឿងម៉ាកហុងដា សេ១២៥ ពណ៌ខ្មៅ ។
សមត្ថកិច្ចបានឲ្យដឹងថា នៅថ្ងៃទី៤ ខែឧសភា ឆ្នាំ២០២២ វេលាម៉ោង១៩និង៣០នាទី នៅចំណុចភូមិផ្លូវប្រាំមួយ ឃុំតាក្រី ស្រុកកំរៀង ខេត្តបាត់ដំបង មានសកម្មភាពចោរ(លួចម៉ូតូ) បង្កដោយជនសង្ស័យមិនស្គាល់អត្តសញ្ញាណ បានធ្វើសកម្មភាពលួចយកម៉ូតូដូចមានភិនភាគខាងលើជារបស់ជនរងគ្រោះឈ្មោះ យូ សារៀម ភេទប្រុស អាយុ៣៦ឆ្នាំរស់នៅភូមិផ្លូវប្រាំមួយឃុំតាក្រី ស្រុកកំរៀងខេត្តបាត់ដំបង មានមុខរបរកសិករក្នុង ខណៈ ជនរងគ្រោះទុកម៉ូតូនៅក្នុងបរិវេណលំនៅដ្ឋានរបស់ខ្លួន ។
នៅក្រោយពេលកើតហេតុ ជនរងគ្រោះបានប្តឹងចូលមកសមត្ថកិច្ចនគរបាលស្រុកកំរៀង ហើយអនុវត្តតាមវិធានការជំនាញរបស់នគរបាលសមត្ថកិច្ចកំណត់មុខសញ្ញាបាន និងឈានដល់ការឃាត់ខ្លួនរួមទាំងដកហូតម៉ូតូប្រគល់ជូនជនរងគ្រោះវិញ ។ បច្ចុប្បន្ន ជនសង្ស័យត្រូវបានរៀបចំសំណុំរឿងបញ្ជូនមកការិយាល័យជំនាញនៅស្នងការដ្ឋានអនុវត្តបន្តតាមច្បាប់ ៕
ប្រភព៖ អគ្គស្នងការដ្ឋាននគរបាលជាតិ
