ភ្នំពេញ៖ កាលពីថ្ងៃទី១៤ ខែមីនា ឆ្នាំ២០២២កន្លងទៅ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងនៅក្នុងសន្និសីទសារព័ត៌មាន ក្នុងសិក្ខាសាលាភាពជាដៃគូសេដ្ឋកិច្ចគ្រប់ជ្រុងជ្រោយតំបន់ នៅសណ្ឋាគារ Hyatt Regency រាជធានីភ្នំពេញ ថាក្រសួងនឹងធ្វើការផ្លាស់ប្តូរការជូនដំណឹងពីកាលកំណត់ថ្លៃប្រេងឥន្ធនៈ ពី១៥ថ្ងៃ មកត្រឹម ១០ថ្ងៃវិញ។
ក្នុងនោះលោកបានបញ្ជាក់ថា “ក្រសួងបានបើកកិច្ចប្រជុំជាមួយក្រសួងដែលពាក់ព័ន្ធដូចជា ក្រសួងហិរញ្ញវត្តុ ក្រសួងរ៉ែ និងថាមពល និងផ្នែកឯកជន អ្នកដែលចែកចាយប្រេងឥន្ធនៈនឹង បានឯកភាពគ្នាគាំទ្រនូវវិធានការរបស់រាជរដ្ឋាភិបាល ដែលពីមុនមក មាន១៥ថ្ងៃនៃការដាក់តម្លៃ ជូនប្រជាពលរដ្ឋ ជាពិសេសអ្នកដែលចែកចាយកុំឱ្យលើសពីតម្លៃនឹង ប៉ុន្តែល្ងាចនេះខ្ញុំនឹងចុះហត្ថលេខាសុំសេចក្តីអនុញ្ញាតពីរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីផ្សព្វផ្សាយក្នុងរយៈ ពេល១០ថ្ងៃម្តង មិនមែន១៥ថ្ងៃទៀតទេ ដើម្បីឱ្យឆាប់មានការផ្លាស់ប្តូរប្រែប្រួលនូវតម្លៃ”៕
