ភ្នំពេញ៖ ក្រោយមានការព្រួយបារម្ភអំពីអតិថិជនចាស់ ដែលបានបង់ថ្លៃសេវាអ៊ីធឺណែតរបស់ក្រុមហ៊ុន Opennet ព្រោះតែខាងក្រសួងប្រៃសណីយ៍ និងទូរគមនាគមន៍ រៀបចំចាត់វិធានការព្យួរអាជ្ញាបណ្ណ ដោយសារតែខាង Opennet មិនទាន់ទូទាត់បំណុលរបស់រដ្ឋ។
ក្នុងនោះបើយោងតាមការបញ្ជាក់របស់ ឯកឧត្ដម សូ វិសុទ្ធី រដ្ឋលេខាធិការក្រសួងប្រៃសណីយ៍ និងទូរគមនាគមន៍ នៅថ្ងៃទី ២០ ខែកុម្ភៈ ឆ្នាំ ២០២២ បានអោយដឹងថា “យោងតាមវិធានការចំពោះមុខ ក្រសួងប្រៃសណីយ៍ និងទូរគមនាគមន៍ និងនិយ័តករទូរគមនាគមន៍កម្ពុជា បានតម្រូវឲ្យក្រុមហ៊ុនបញ្ឈប់ការផ្ដល់សេវាជូនអតិថិជនថ្មីៗ និងចុះកិច្ចសន្យាធុរកិច្ចជាមួយនឹងក្រុមហ៊ុនដៃគូផ្សេងៗ នៅក្នុងរយៈពេលនៃការព្យួរអាជ្ញាបណ្ណនេះ។ ដូចនេះការប្រើប្រាស់សេវាអ៊ីនធឺណិតរួមទាំងសេវា wifi របស់អតិថិជនបច្ចុប្បន្ន នឹងពុំមានការប៉ះពាល់ឡើយ”។
ឯកឧត្តមបានបន្ថែមទៀតថា “ក្រសួងប្រៃសណីយ៍ និងទូរគមនាគមន៍ និងនិយ័តករទូរគមនាគមន៍កម្ពុជា នឹងចាត់វិធានការស្របតាមលក្ខខណ្ឌនៃអាជ្ញាបណ្ណ ក៏ដូចជាច្បាប់និងបទប្បញ្ញត្តិជាធរមាន ដើម្បីឱ្យក្រុមហ៊ុន Opennet សងបំណុលនិងកាត់បន្ថយផលប៉ះពាល់ដល់អ្នកប្រើប្រាស់ជាអប្បបរមា”៕
