បាត់ដំបង ៖ នៅថ្ងៃទី១៩ ខែកុម្ភៈ ឆ្នាំ២០២២ វេលាម៉ោង១១និង៣០នាទី នៅលើកំណាត់ផ្លូវជាតិលេខ៥ ចំណុចក្រុមទី១៥ ភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង មានករណីគ្រោះថ្នាក់ចរាចរណ៍មួយកើតឡើងរវាងរថយន្តនិងម៉ូតូបណ្តាលឲ្យស្លាប់ម្នាក់ និងរបួសធ្ងន់ម្នាក់ ។
លោកវរសេនីយ៍ឯក ស៊ុន សុវណ្ណ អធិការនគរបាលស្រុកសង្កែ បានរាយការណ៍អោយដឹងថា គ្រោះថ្នាក់ចរាចរណ៍នេះបង្កឡើងដោយរថយន្តម៉ាកសាំយ៉ុង ពណ៌លឿង ពាក់ស្លាកលេខ កំពង់ឆ្នាំង 2A-0745 អ្នកបើកបរឈ្មោះ មុំ សុផាន់ណា ភេទប្រុស អាយុ៣៥ឆ្នាំ រស់នៅភូមិគក ឃុំខុនរ៉ង ស្រុកបរិបូរណ៍ ខេត្តកំពង់ឆ្នាំង ។ លុះមកដល់ចំណុចកើតហេតុខាងលើបានបុកនឹងម៉ូតូ០១គ្រឿង ម៉ាកហុងដា (កូរ៉េ) ពណ៌ក្រហម ស៊េរីចាស់ គ្មានស្លាកលេខ បើកបរដោយឈ្មោះ ស ទូច ភេទប្រុស អាយុ៧៥ឆ្នាំ រស់នៅភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង (ស្លាប់នៅកន្លែងកើតហេតុ) និងអ្នករួមដំណើរ១នាក់ទៀត ឈ្មោះ ខន ប៊ុនថៃ ភេទប្រុស អាយុ០៧ឆ្នាំ រស់នៅភូមិឃុំជាមួយគ្នា (រងរបួសធ្ងន់) ។
តាមការពិនិត្យកន្លែងកើតហេតុ សមត្ថកិច្ចអាចបញ្ជាក់បានថា ករណីនេះ បណ្តាលមកពីម៉ូតូបើកបរក្នុងទិសដៅពីលិចទៅកើតលុះ ពេលមកដល់ចំណុចកើតហេតុបត់ឆ្វេងខ្វះការប្រុងប្រយត្ន័ ក៏បណ្តាលអោយរថយន្តបើកបរបញ្ច្រាសទិសគ្នាជ្រុលមកបុកពេញទំហឹងតែម្តង ។
បច្ចុប្បន្ន អ្នកបើកបររថយន្តត្រូវបានសមត្ថកិច្ចជំនាញឃាត់ខ្លួន និងកសាងសំណុំរឿងបញ្ជូនទៅការិយាល័យចរាចរណ៍ផ្លូវគោកខេត្តបាត់ដំបង រង់ចាំចំណាត់ការតាមផ្លូវច្បាប់ ។ ចំណែកសាកសពជនរងគ្រោះ សមត្ថកិច្ចបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ប្រភព៖ អគ្គស្នងការដ្ឋាននគរបាលជាតិ
