ភ្នំពេញ៖ ធនាគារអភិវឌ្ឍន៍អាស៊ី (ADB) បានអនុម័តប្រាក់កម្ចីចំនួន៩៥លានដុល្លារដើម្បីជួយរាជរដ្ឋាភិបាលកម្ពុជាក្នុងដំណើរការចាក់វ៉ាក់សាំងប្រឆាំងនឹងជំងឺកូវីដ១៩ ជូនប្រជាពលរដ្ឋ ដែលមានសុវត្ថិភាព និងប្រសិទ្ធភាព ចាប់ពីឆ្នាំ ២០២២ ដល់ឆ្នាំ ២០២៣ រួមមានការចាក់វ៉ាក់សាំងជំរុញប្រចាំឆ្នាំសម្រាប់អ្នកដែលបានចាក់វ៉ាក់សាំងរួច និងការចាក់វ៉ាក់សាំងមូលដ្ឋានសម្រាប់កុមារអាយុក្រោម ៥ ឆ្នាំ។ លោក Rikard Elfving អ្នកឯកទេសជាន់ខ្ពស់ផ្នែកសង្គមរបស់ ADB បានគូសបញ្ជាក់ថា “គម្រោងនេះនឹងជួយកម្ពុជាដើម្បីសង្គ្រោះជីវិតដោយកាត់បន្ថយចំនួនករណី ឆ្លងមេរោគ ធ្ងន់ធ្ងរនិងបង្កើនល្បឿននៃការស្តារសេដ្ឋកិច្ចរបស់ប្រទេសពីជំងឺរាតត្បាត។
ADB ក៏នឹងផ្តល់ ជំនួយបច្ចេកទេសចំនួន១លានដុល្លារផងដែរ ដើម្បីជួយកម្ពុជាបង្កើនប្រសិទ្ធភាពនៃប្រព័ន្ធ ដឹកជញ្ជូន និងផ្គត់ផ្គង់វ៉ាក់សាំងព្រមទាំងកាត់បន្ថយបញ្ហាប្រឈមក្នុងការ ទទួលបានវ៉ាក់ សាំងក្នុងចំណោមស្ត្រីកុមារីកុមារតូចនិងក្រុមពលរដ្ឋដែលនៅឆ្ងាយ។”
លោកបានលើកឡើងថា ប្រទេសកម្ពុជាទទួលបានជោគជ័យយ៉ាងធំធេង ក្នុងការគ្រប់គ្រងការរីករាលដាលនៃកូវីដ១៩ក្នុងឆ្នាំ២០២០។ ប៉ុន្តែការផ្ទុះការឆ្លងនៅឆ្នាំ២០២១បានបង្កជាសម្ពោធយ៉ាងធ្ងន់ ធ្ងរដល់ ប្រព័ន្ធថែទាំសុខភាពហើយបណ្តាលឱ្យមានការបិទសាលារៀន និងអាជីវកម្មជា ច្រើន មួយរយៈពេលធំក្នុងឆ្នាំនោះ។ ជាមួយគ្នានេះ ប្រទេសកម្ពុជាបានផ្តល់ចាក់វ៉ាក់សាំងយ៉ាងពេញលេញដល់ប្រជាពលរដ្ឋប្រមាណ៨០ភាគរយ នៃប្រជាពលរដ្ឋសរុប១៦,៧លាននាក់ចាប់តាំងពីការចាប់ផ្តើមយុទ្ធនាការចាក់វ៉ាក់សាំងថ្នាក់ជាតិនៅថ្ងៃទី១០ ខែកុម្ភៈ ឆ្នាំ២០២១មក។ ជាមធ្យម ពល រដ្ឋកម្ពុជាច្រើនជាងម្នាក់ក្នុងចំណោមពលរដ្ឋប្រាំនាក់ ឬ២១,៨ភាគរយបានទទួលការចាក់ វ៉ាក់សាំងដូសជំរុញ។
ទោះបីជាយ៉ាងនេះក្តី ប្រព័ន្ធសុខាភិបាលរបស់ប្រទេសនៅតែ ងាយ រងគ្រោះចំពោះការកើនឡើងនៃការឆ្លងថ្មីនៃមេរោគបំប្លែងខ្លួនដូចជា Delta និង Omicron ជាដើម។ បើតាម ADB បន្ថែមពីលើប្រាក់កម្ចីដែលបានមកពីមូលនិធិសម្រាប់ការទទួលបានវ៉ាក់សាំងនៅអាស៊ីប៉ាស៊ីហ្វិក(Asia Pacific Vaccine Access Facility ឬហៅកាត់ថា APVAX) ធនាគារវិនិយោគហេដ្ឋារចនាសម្ព័ន្ធអាស៊ី(Asian Infrastructure Investment Bank) ដែលរំពឹងថា នឹងផ្តល់ជាសហហិរញ្ញប្បទានចំនួន ៥០ លានដុល្លារ បើមានការយល់ព្រមពីក្រុមប្រឹក្សាភិបាលរបស់ខ្លួន។
ចំពោះគម្រោងខាងលើ ជាការគាំទ្របន្ថែមទៅលើជំនួយទាក់ទងនឹងកូវីដ១៩កន្លងទៅរបស់ ADB ដល់កម្ពុជា។
សូមរម្លឹកផងដែរថា កាលពីថ្ងៃទី៨ខែកក្កដាឆ្នាំ២០២០ ADB បានផ្តល់ប្រាក់កម្ចីចំនួន២៥០លានដុល្លារ ដើម្បីជួយរាជរដ្ឋាភិបាលក្នុងការកាត់បន្ថយផលប៉ះពាល់ធ្ងន់ធ្ងរដល់ សុខ ភាពសង្គមនិងសេដ្ឋកិច្ចនៃជំងឺរាតត្បាតនេះ។ លើសពីនេះ ADB ក៏បានផ្តល់ឧបករណ៍ការ ពារខ្លួនប្រមាណ១,៧លានគ្រឿងដល់កម្ពុជាក្នុងឆ្នាំ២០២១ផងដែរ។ ចាប់តាំងពីឆ្នាំ២០០៥ មក ADB បានគាំទ្រគម្រោងគ្រប់គ្រងជំងឺឆ្លងក្នុងតំបន់របស់ក្រសួងសុខាភិបាលកម្ពុជា។ នៅខែតុលាឆ្នាំ២០២១ ADB បានអនុម័តហិរញ្ញប្បទានបន្ថែមចំនួន ៣០ លានដុល្លារសម្រាប់ គម្រោងសន្តិសុខសុខភាពមហាអនុតំបន់មេគង្គ(Greater Mekong Subregion Health Security Project) ដើម្បីពង្រឹងប្រព័ន្ធសុខាភិបាលរបស់ប្រទេសកម្ពុជាខណៈពេល មានការ កើនឡើងនៃករណីជំងឺកូវីដ១៩៕
ប្រភព៖ ក្រសួងព័ត៌មាន
