ភ្នំពេញ ៖ នៅថ្ងៃទី០៧ ខែកុម្ភៈ ឆ្នាំ២០២២ វេលាម៉ោង០៩ និង៤០នាទី សមត្ថកិច្ចនគរបាលខណ្ឌដង្កោ បានឃាត់ខ្លួនជនសង្ស័យ ០២នាក់ ករណីលួចមានស្ថានទម្ងន់ទោស (កាច់សោរកម៉ូតូ) ស្ថិតត្រង់ចំណុចសំណង់ផ្ទះល្វែង ខាងមុខសួនឧស្សាហកម្មវឌ្ឍនៈ២ ស្ថិតនៅភូមិ ទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
សមត្ថកិច្ច បានឲ្យដឹងថា ៖ ជនរងគ្រោះឈ្មោះ ភិន រ៉ាឌី ភេទប្រុស អាយុ២៦ឆ្នាំ ជនជាតិខ្មែរ មុខរបរ ជាងភ្លើង ទីលំនៅភូមិត្រពាំងស្លា ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ។ ជនសង្ស័យ០២នាក់ ១-ឈ្មោះ រុន សុវណ្ណឌី ភេទប្រុស អាយុ៤៤ឆ្នាំ ជនជាតិខ្មែរ មុខរបរនិពន្ធនាយករងសាព័ត៌មាន សម្លេងប្រជាជន ស្នាក់នៅផ្ទះជួល ស្ថិតនៅភូមិកន្ទោក សង្កាត់កន្ទោល ខណ្ឌកំបូល រាជធានីភ្នំពេញ ។ ២-ឈ្មោះ ចំរើន សុផល ភេទប្រុស អាយុ៣៨ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល ភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្តាល ។
វត្ថុតាងដកហូតរួមមាន ៖
១-ម៉ូតូម៉ាកហុងដា BEAT ពណ៌ក្រហម ពាក់ផ្លាកលេខភ្នំពេញ1IJ-7340 មានលេខតួ9036891 និងលេខម៉ាស៊ីន 9037400 ចំនួន០១គ្រឿង
២-ម៉ូតូម៉ាកហុងដាសេ១២៥ ពណ៌ខ្មៅ សេរីឆ្នាំ២០២២ ពាក់ផ្លាកលេខព្រៃវែង 1V-5427 មានលេខតួ និងលេខម៉ាស៊ីន6120710 ចំនួន០១គ្រឿង
៣-តួណឺវីសដងលឿងចំនួន០១
៤-ទូរស័ព្ទដៃម៉ាកណូគាចុចពិល ចំនួន០២គ្រឿង (ពណ៌កាប់ស្ទាំងចំនួន០១គ្រឿង,ពណ៌ផ្កាឈូកចំនួន០១គ្រឿង)
៥-ប័ណ្ណសម្គាល់ខ្លួនសារព័ត៌មាន សម្លេងប្រជាជន របស់ឈ្មោះ រុន សុវណ្ណឌីចំនួន០២សន្លឹក
៦-ប័ណ្ណសម្គាល់យានយន្តថតចម្លងរបស់ឈ្មោះ ហែម សុផាត ចំនួន០១សន្លឹក
៧-នាមប័ណ្ណសារព័ត៌មាន សម្លេងប្រជាជន របស់ឈ្មោះ រុន សុវណ្ណឌី ចំនួន០៤សន្លឹក
៨-កាតចាក់វ៉ាក់សាំងកូវីដ-១៩ ក្រសួងការពារជាតិចំនួន០១
៩-កូនសោរម៉ូតូចំនួន០១
១០-កូនសោររថយន្តចំនួន០១ ។
បច្ចុប្បន្នជនសង្ស័យ ត្រូវបានសមត្ថកិច្ចឃាត់ខ្លួននៅប៉ុស្តិ៍នគរបាលរដ្ឋបាលក្រាំងពង្រ ដើម្បីចាត់ការតាមនីតិវិធីច្បាប់ ៕
