ស្វាយរៀង៖ កាលពីម៉ោង ៦:៣០នាទីល្ងាច ថ្ងៃទី៤ ខែកុម្ភៈ ឆ្នាំ២០២២កន្លងទៅនេះ មានករណីចោរមួយក្រុមដែលស្លៀកលីអូ ចូលប្លន់ផ្ទះប្រជាជននៅចំណុចភូមិឫស្សីជួរខាងជើង ឃុំក្រាលគោ ស្រុកស្វាយជ្រុំខេត្តស្វាយរៀង។
បើយោងតាមប្រភពពីសមត្ថកិច្ចបានអោយដឹងថា ជនរងគ្រោះមានឈ្មោះ ចែត ភន អាយុ ៤០ឆ្នាំ និងប្រពន្ធឈ្មោះ អ៊ុន ធីតា អាយុ ៣០ឆ្នាំ រស់នៅទីតាំងខាងលើ។
ក្នុងនោះជនរងគ្រោះបានបញ្ជាក់ថានៅម៉ោងកើតហេតុខាងលើស្រាប់តែមានចោរ ៣នាក់ស្លៀកលីអូ ដោយមានអាវុធវែងគ្រប់ដៃ បានចូលមកភ្ជង់ខ្លួន។ ដោយភ័យខ្លាចពេកខ្លួនបានយកកាបូប ដែលនៅក្នុងនោះមានលុយ ២០០ដុល្លារ និងខ្សែដៃមាស ៥ជីមួយខ្សែ។ ក្រោយធ្វើសកម្មភាពរួចក្រុមចោរខាងលើបាននាំគ្នាគេចខ្លួនពីកន្លែងកើតហេតុដោយសុវត្ថិភាព។
បន្ទាប់ពីទទួលបានព័ត៌មាន លោកអនុសេនីយ៍ឯក ស្រ៊ី ស៊ីថន ក្រុមការងារប្រចាំបញ្ជា ១១៧ បានបញ្ជូនព័ត៌មានទៅលោកប៊ូ សារ៉េន ស្នងការរង នៃស្នងការដ្ឋាន នគរបាលខេត្តស្វាយរៀង ដើម្បីចុះអន្តរាគមន៍បន្ទាន់៕
