កំពង់ស្ពឺ ៖ កាលពីថ្ងៃទី៥ ខែមករា ឆ្នាំ២០២២ វេលាម៉ោង ១១:២៧នាទី នៅលើផ្លូវជាតិលេខ ៤៤ ចន្លោះគីឡូម៉ែត្រ ៧២-៧៣ ស្ថិតក្នុងភូមិផ្លោច ឃុំត្រពាំងជោ ស្រុកឪរ៉ាល ខេត្តកំពង់ស្ពឺ។ មានករណីគ្រោះថ្នាក់មួយដោយរថយន្ត ម៉ាកហុីណូ ក្បាលពណ៌ត្រួយចេក ទ្រុងពណ៌ខៀវ ពាក់ស្លាកលេខភ្នំពេញ 3B-1259 ក្នុងនោះអ្នកបើកបរមិនស្គាល់អត្តសញ្ញាណ បានរត់គេចខ្លួន។ រថយន្តខាងលើបានបើកបរពីទិសខាងកើតទៅលិចលុះបើកដល់ចំណុចខាងលើក៏បានរបូតកង់ក្រោយខាងឆ្វេង ដាច់រត់ចូលទៅបុកមនុស្ស២នាក់ ដែលកំពុងអង្គុយលេងខាងមុខផ្ទះដោយមិនដឹងខ្លួន។ ក្នុងនោះជនរងគ្រោះទាំង២នាក់ មានឈ្មោះ សុខ សឿន ភេទប្រុស អាយុ៧៩ឆ្នាំ ជាប្តី (ស្លាប់) និងម្នាក់ទៀតឈ្មោះ អិន អឿន ភេទស្រី អាយុ៦៥ឆ្នាំ ប្រពន្ធ របួសស្រាល។
ក្រោយកេីតហេតុ អ្នកបេីកបររថយន្តបានបន្ដបេីកគេចរហូតមកដល់ចំណុចភូមិច្រកទៀក ឃុំត្រពាំងជោ ស្រុកឱរ៉ាល់ គីឡូម៉ែត្រលេខ ៦៥ ទុករថយន្ដចោលគេចខ្លួនតែម្ដង។ បច្ចុប្បន្នសមត្ថកិច្ចនគរបាលបានចុះអន្ដរាគមន៍នៅកន្លែងកេីតហេតុនិងបានចំណាត់ការយករថយន្ដបង្កមកកាន់អធិការដ្ឋាននគរបាលស្រុកឱរ៉ាល់ ដេីម្បីពិនិត្យកសាងសំណុំរឿងបញ្ជូនទៅជំនាញចាត់ការតាមនីតិវិធីបន្ដ៕
