ព្រះសីហនុ ៖ កាលពីម៉ោងប្រមាណ ១១:៥០នាទីព្រឹកថ្ងៃទី២៥ ខែធ្នូ ឆ្នាំ២០២១កន្លងមកនេះមានករណីគ្រោះថ្នាក់ចរាចរណ៍មួយបានកើតឡើងនៅលើផ្លូវជាតិលេខ៣ ចន្លោះគីឡូម៉ែត្រលេខ ១៧៥-១៧៦ ស្ថិតនៅភូមិវាលតាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ ក្រោយរថយន្តមួយគ្រឿងបានបើបុកម៉ូតូ ២គ្រឿង បណ្តាលអោយមានអ្នកស្លាប់ម្នាក់ និងរបួសធ្ងន់ ២នាក់។
បើតាមប្រភពីកន្លែងកើតហេតុបានអោយដឹងថារថយន្តបង្កម៉ាកឡិចស៊ីស 570 ពណ៌ទឹកមាស ពាក់ផ្លាកលេខ ភ្នំពេញ 2BE-3366 បើកបរដោយឈ្មោះ កៅ គៀតឡេង ភេទប្រុស អាយុ២១ឆ្នាំ មានទីលំនៅភូមិខ្នា ឃុំជ្រាវ ស្រុកសៀមរាប ខេត្តសៀមរាប ឃាត់ខ្លួនអ្នកបើកបរបាន។ ខណៈភាគីរងគ្រោះមានម៉ូតូចំនួន២គ្រឿង ក្នុងនោះម៉ូតូមួយគ្រឿងម៉ាក EXCITER ពណ៌ខៀវ ពាក់ផ្លាកលេខ ព្រះសីហនុ 1E-7633 បើកបរដោយឈ្មោះ ឡៃ មើត ភេទប្រុស អាយុ២៩ឆ្នាំ មានទីលំនៅភូមិបន្ទាយប្រិយ៍ ឃុំអណ្ដូងថ្ម ស្រុកព្រៃនប់ ខេត្តព្រះសីហនុ (របួសធ្ងន់) និងអ្នករួមដំណើរម្នាក់ឈ្មោះ ម៉ើល កសឹម ភេទប្រុស អាយុ១៧ឆ្នាំ មានទីលំនៅភូមិអូត្រាវ ឃុំអណ្ដូងថ្ម ស្រុកព្រៃនប់ ខេត្តព្រះសីហនុ (របួសធ្ងន់) និងម៉ូតូ១គ្រឿងទៀត ម៉ាកហុងដាឌ្រីម ធុនC125 ពណ៌ខ្មៅ ពាក់ផ្លាកលេខ ព្រះសីហនុ 1E-6084 បើកបរដោយឈ្មោះ អាន អ៊ូន ភេទស្រី អាយុ១៥ឆ្នាំ មានទីលំនៅភូមិទួល ឃុំទឹកល្អក់ ស្រុកព្រៃនប់ ខេត្តព្រះសីហនុ (បានស្លា.ប់)។
ចំពោះមូលហេតុ ដែលបង្កអោយមានគ្រោះថ្នាក់នេះ ដោយសារតែរថយន្តបង្កព្យាយាមបើកវ៉ាជែង ចូលគន្លងផ្លុវម្ខាងទៀត ហើយក៏ជ្រុលទៅបុកម៉ូតូទាំង ២គ្រឿងតែម្តង។ ក្រោយពេលកើតហេតុ សពជនរងគ្រោះម្នាក់ ត្រូវបានប្រគល់ជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ចំណែកជនរងគ្រោះរងរបួសធ្ងន់ទាំង២នាក់ត្រូវបានបញ្ជូនទៅសង្គ្រោះនៅគ្លីនិកឯកជនមួយកន្លែងក្នុងឃុំវាលរេញ ។ រីឯអ្នកបើកបររថយន្តត្រូវបាននាំខ្លួនមកសាកសួរនៅអធិការដ្ឋាននគរបាលស្រុកព្រៃនប់ ។ ដោយឡែករថយន្ត និងម៉ូតូចំនួន២គ្រឿង ត្រូវបានយកមករក្សាទុកនៅអធិការដ្ឋាននគរបាលស្រុកព្រៃនប់ ៕
