ភ្នំពេញ៖ កាលពីវេលាម៉ោងប្រមាណ ១១:៣០នាទីយប់ថ្ងៃទី១៧ ខែធ្នូ ឆ្នាំ២០២១នេះ មានករណីបុរសជនជាតិម្នាក់ត្រូវអ្នករត់កង់បីម្នាក់វាយបែកក្បាលហើយយកកាបូបលុយ នៅចំណុចមុខការដ្ឋានសំណង់មួយកន្លែង (ទល់មុខអតីតក្រុមហ៊ុនទូរស័ព្ទ qb) ស្ថិតនៅក្នុងខណ្ឌចំការមន ផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន។
បើតាមប្រភពពីកន្លែងកើតហេតុបានអោយដឹងថាបុរសជនជាតិចិនម្នាក់ បានរត់ឆ្លងផ្លូវស្រែកហៅគេឲ្យជួយ ខណៈក្បាលត្រូវបែកហូរឈាមជោគខ្លួន។ ជនរងគ្រោះបានជិះកង់បីឥណ្ឌា (ពណ៍ក្រហម) មិនចាំស្លាកលេខ មកឈប់នៅចំណុចកើតហេតុខាងលើ ហើយក៏បានប្រតាយប្រតប់គ្នាជាមួយអ្នកបើកកង់បីឥណ្ឌានោះ។ ស្របពេលអ្នកបើកកង់បីបានវាយចំក្បាលបណ្ដាលបែក និងយកកាបូបលុយរបស់ជនជាតិចិននោះ ហើយឡើងបើកកង់បីជិះចេញទៅបាត់ស្រមោលតែម្តង។
បន្ទាប់មកសមត្ថកិច្ចមូលដ្ឋានចុះមកដល់កន្លែងកើតហេតុ ប៉ុន្តែជនជាតិចិនរងគ្រោះមិនទាន់បានទៅដាក់ពាក្យបណ្ដឹងនោះឡេីយ ដោយបានតេហៅនារីជនជាតិខ្មែរម្នាក់ដែលជាមិត្តស្រីស្នាក់នៅផ្ទះជួលនៅក្បែរកន្លែងកើតហេតុចេញមកជួបគ្នា។ ហើយក៏ហៅកង់បីឥណ្ឌា ជិះចេញទៅរកកន្លែងព្យាបាលរបួស៕
