ព្រះវិហារ៖ កាលពីថ្ងៃទី១១ ខែធ្នូ ឆ្នាំ២០២១កន្លងទៅកម្លាំងឣាវុធហត្ថខេត្តព្រះវិហារបានកំណត់មុខសញ្ញា និងស្រាវជ្រាវឈានដល់ការចាប់ខ្លួនជនសង្ស័យម្នាក់ពីបទបាញ់សម្លាប់មនុស្សនៅស្រុកស្រយង់។
បើយោងតាមប្រភពពីមន្ត្រីអាវុធហត្ថបានឱ្យដឹងថា កាលពីល្ងាចថ្ងៃទី១១ ខែធ្នូ ឆ្នាំ២០២១ កម្លាំងជំនាញបានចាប់ជនដៃដល់ឈ្មោះ ភោគ ម៉ើ ភេទប្រុស អាយុ ២៨ឆ្នាំ ជាកសិករ រស់នៅភូមិម្រេច ឃុំស្រយង់ ស្រុកគូលែន ខេត្តព្រះវិហារ និងបានដកហូតអាវុធកែច្នៃមួយដើម។ ចំណែកជនរងគ្រោះឈ្មោះ ឃត់ ឡុញ ភេទប្រុស អាយុ ៥៤ឆ្នាំ រស់នៅភូមិ ឃុំជាមួយគ្នា បានស្លាប់ដោយសារជនសង្ស័យបាញ់ចំលើដោះខាងស្តាំធ្លាយមកផ្នែកខាងក្រោយ។
បើតាមចម្លើយសារភាពរបស់ជនសង្ស័យបានបញ្ជាក់ថា ខ្លួនពិតជាបានប្រើប្រាស់អាវុធកែឆ្នៃម៉ាកការប៊ីន លួចបាញ់ឈ្មោះ ឃត់ ឡុញ ឱ្យស្លាប់ពិតប្រាកដមែន។ ចំពោះមូលហេតុ គឺដោយសារឿងគំនុំកាលពី ៣ឆ្នាំមុន (ឈ្មោះ ឃត់ ឡុញ បានជេរប្រមាថមកលើឪពុក ម្ដាយរបស់ខ្លួនរឿងរុះរើទ្រុងមាន់)។ ឈ្មោះ ឃត់ ឡុញ តែងតែជេរប្រមាថជាបន្តបន្ទាប់ពេលខ្លួនស្រវឹងស្រាម្ដងៗ ដែលជាហេតុធ្វើឱ្យខ្លួនទ្រាំមិនបានក៏បាញ់សម្លាប់តែម្ដង។ បច្ចុប្បន្នសមត្ថកិច្ចបានកសាងសំណុំរឿងនឹងបញ្ជូនទៅតុលាការដើម្បីចាត់ការតាមច្បាប់៕
ប្រភព៖ សហការី
