បាត់ដំបង ៖ នៅយប់ថ្ងៃទី១១ ខែធ្នូ ឆ្នាំ២០២១ វេលាម៉ោង២៣និង២០នាទី នៅក្នុងលំនៅរបស់ឈ្មោះ តាត ណែម ភេទប្រុស អាយុ៤៦ឆ្នាំ ស្ថិតក្នុងក្រុមទី២៣ ភូមិរាមគន់ ឃុំគារ ស្រុកមោងឫស្សី ខេត្តបាត់ដំបង ជនសង្ស័យបានធ្វើសកម្មភាពចូលលួចយកម៉ូតូរបស់ជនងគ្រោះដែលទុកនៅខាងក្រោមផ្ទះ ។
បន្ទាប់ពីសកម្មភាពលួចយកបានម៉ូតូបានសម្រេច ជនសង្ស័យយកម៉ូតូទៅទុកនៅលើផ្លូវចម្ងាយប្រមាណ១០០ម៉ែត្រពីផ្ទះជនរងគ្រោះ ហើយជនសង្ស័យបានចូលមកលួចយកម៉ូតូ០១គ្រឿងទៀត ក៏ប៉ុន្តែក្នុងពេលចូលមកធ្វើសកម្មភាពម្តងទៀតនេះ ត្រូវជនរងគ្រោះជាម្ចាស់ផ្ទះភ្ញាក់ដឹងខ្លួនទាន់ស្រែកឆោឡោផ្អើលអ្នកជិតខាង នាំគ្នាដេញរហូតឃាត់ខ្លួនបានរួមទាំងម៉ូតូនោះផង។ ភ្លាមៗជនរងគ្រោះបានរាយការណ៍ពីករណីនេះដល់សមត្ថកិច្ចនគរបាល ចុះទៅដល់ចុះណុចកើតហេតុនិងឃាត់ខ្លួនជនសង្ស័យយមកកាន់អធិការដ្ឋាននគរបាលស្រុកមោងឫស្សីដើម្បីធ្វើការសាកសួរស្រាវជ្រាវបន្ត ។
ជនសង្ស័យឈ្មោះ ស៊ឹម ហ៊ាង ហៅ ត្រដក់ ភេទប្រុស អាយុ៣៦ឆ្នាំ រស់នៅភូមិកណ្ដាល ឃុំអន្លង់ត្នោត ស្រុកក្រគរ ខេត្តពោធិ៍សាត់ ។
វត្ថុតាងដកហូតមាន៖ -ម៉ូតូម៉ាកវេវអាល់ហ្វា ស៊េរីឆ្នាំ២០២០ ពណ៌ខៀវ គ្មានស្លាកលេខ -ម៉ូតូម៉ាកហុងដាទ្រីម សេ១២៥ ស៊េរី២០២០ ពណ៌ខ្មៅស្លាកលេខ បាត់ដំបង 1AO-7495 ។
លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានបញ្ជាក់ថា សកម្មភាពលួចយកទ្រព្យសម្បត្តិនេះមុខសញ្ញាអាចមានគ្នាលើសពីម្នាក់ តែក្នុងពេលសាកសួរជនសង្ស័យបានបដិសេធថា មិនមានបក្ខពួកផ្សេងទៀតទេ គឺគេធ្វើសកម្មភាពតែម្នាក់ឯងលួចយកម៉ូតូចំនួន០២គ្រឿង ។
អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនឹងយោបល់របស់លោកវរសេនីយ៍ឯក លឹម ពុទ្ធីឡា ស្នងការរងផែនការងារនគរបាលព្រហ្មទណ្ឌ នាពេលនេះសមត្ថកិច្ចនគរបាលស្រុកបានរៀបចំកសាងសំណុំរឿងបញ្ជូនមកការិយាល័យជំនាញខេត្តដើម្បីអនុវត្តបន្តតាមផ្លូវច្បាប់ ។ រីឯម៉ូតូបានប្រគល់ជូនម្ចាស់បានប្រើប្រាស់ជាធម្មតា ៕
ប្រភព៖ អគ្គស្នងការដ្ឋាននគរបាលជាតិ
