ភ្នំពេញ៖ កាលពីម៉ោងប្រមាណ ៧:៣០នាទីយប់ថ្ងៃទី២១ ខែវិច្ឆិកា ឆ្នាំ២០២១ម្សិលមិញនេះ មានហេតុការណ៍គ្រោះថ្នាក់ចរាចរណ៍មួយបានកើតឡើងនៅចំនុចផ្លូវបេតុងព្រៃ សរ មុខនិងបុរីទ្បុងនី ក្នុងសង្កាត់ព្រៃ សរ ខណ្ឌដង្កោរ ខណ្ឌដង្កោរ រាជធានីភ្នំពេញ បណ្តាលអោយបុរសម្នាក់ដែលជាអ្នកបើកម៉ូតូស្លាប់ភ្លាមៗនៅកន្លែង។
នេះបើតាមប្រភពពីកន្លែងកើតហេតុបានអោយដឹងថានៅម៉ោងកើតហេតុខាងលើបុរសរងគ្រោះបានជិះម៉ូតូពីផ្ទះក្នុងគោលបំណងចង់ទៅទិញបង្អែមដើម្បីញាំ។ ស្រាប់តែមកដល់ចំណុចកើតហេតុត្រូវរថយន្តស៊េរីទំនើបមួយគ្រឿងបើកបុក និងអូសប្រមាណ ៥០ម៉ែត្រ បណ្តាលអោយបុរសរងគ្រោះស្លាប់នៅនឹងកន្លែងតែម្តង។ ក្រោយកើតហេតុជនបង្កព្យាយាមបើកទ្វាររថយន្តចង់រត់គេចពីកន្លែងកើតហេតុ ប៉ុន្តែត្រូវបានប្រជាពលរដ្ឋនៅទីតាំងខាងលើធ្វើការឃាត់ខ្លួនប្រកួតអោយសមត្ថកិច្ច។ ប្រភពដដែរបានបន្ថែមថា បុរសជាតៃកុងឡានបង្កហេតុ គឺមានអាការៈស្រវឹងស្រាផងដែរ៕
