ភ្នំពេញ៖ នៅថ្ងៃទី៤ ខែវិច្ឆិកា ឆ្នាំ២០២១នេះ មានការភ្ញាក់ផ្អើលមួយធ្លាប់មាន ដោយសារតែតម្លៃសំបុត្រយន្តហោះរវាងកម្ពុជានិងចិនមានការឡើងថ្លៃខ្លាំងរហូតចន្លោះពី ៥ពាន់ ទៅជាង១ម៉ឺនដុល្លារ។ ដោយជាធម្មតាតម្លៃសំបុត្រចន្លោះប្រហែល ៤០០ទៅ៥០០ដុល្លារប៉ុណ្ណោះ ដែលនេះធ្វើអោយតម្លៃខុសគ្នាជិត២០ដង។
ក្នុងនោះលោក ហូរ វណ្ណឌី ទីប្រឹក្សាសមាគមទេសចរណ៍កម្ពុជា និងជាអគ្គនាយកក្រុមហ៊ុនភ្នាក់ងារទេសចរណ៍ វើល អ៊ិចប្រេស បានបញ្ជាក់នៅមូលហេតុដែលធ្វើអោយតម្លៃសំបុត្រឡើងថ្លៃនេះថា “ដោយសារតែថាមានហេតុផលទី១. នៅខាងចិនគ្មានជើងយន្តហោះមកកម្ពុជា ជាលក្ខណៈពាណិជ្ជកម្ម ហើយទី២. យើងឃើញហើយពេលមានមកម្តងៗជាលក្ខណៈជួល។ ការដែលជួលនេះហើយ ដែលធ្វើឱ្យតម្លៃនេះវាផ្ទុះកាន់តែខ្លាំង។ កន្លងមកយើងឃើញហើយនៅស្រុកចិន សំបុត្រយន្តហោះតែ ៤០០ដុល្លារ, ៥០០ដុល្លារ ឬ៧០០ដុល្លារទៅ៨០០ដុល្លារ ប៉ុន្តែក្នុងអំឡុងពេលកូវីដផ្ទុះខ្លាំង គឺមានការកើនឡើងខ្លាំង ចាប់ពី៥ពាន់ដុល្លារដល់ជាង១ម៉ឺនដុល្លារក្នុងមួយជើង។ វាជាប្រវត្តិសាស្ត្រ សម្រាប់សំបុត្រយន្តហោះ ថ្លៃខ្ពស់ហួសពីការស្មាន”។
ក្នុងនោះលោកស៊ិន ចាន់សិរីវុត្ថា រដ្ឋលេខាធិការដ្ឋានអាកាសចរស៊ីវិល បានអោយដឹងថា “យើងដឹងហើយថា ខាងចិនគាត់មានវិធានការតឹងតែងមុននឹងចេញ និងចូល អីចឹងភ្ញៀវធ្វើដំណើរ គឺគាត់ពិបាកធ្វើដំណើរ ការហោះហើរក៏អត់សូវមានដែរ មួយអាទិត្យមានមួយជើង ឬក៏ពីរជើង ហើយមួយជើង ឬក៏ពីរជើងភាគច្រើនទៅពីខ្មែរទៀត ហោះមកពីចិនអត់សូវមានមនុស្ស។ អីចឹងនៅពេលដែលភ្នាក់ងារអាកាសចរណ៍ គេប្រមូលបានមនុស្សគ្រប់ហើយ គេហៅយន្តហោះមក ប៉ុន្តែហោះមកគឺទទេ ដូច្នេះតម្លៃហោះមកទទេគាត់គិតមួយជាពីរ ទើបសំបុត្រវាឡើងថ្លៃ”។
លោក ហូរ វណ្ណឌី បានបន្ថែមថា ក្នុងករណីដែលពួកគាត់ទប់ស្កាត់ ការរីករាលដាលនៃជំងឺកូវីដ១៩បាន យើងជឿជាក់ថា ខាងរដ្ឋាភិបាលចិន ពីព្រោះថារដ្ឋាភិបាលចិន លោកមានសុភវិនិច្ឆ័យ ក្នុងការទំនាក់ទំនងជាមួយរាជរដ្ឋាភិបាលកម្ពុជា ក៏ដូចជាប្រទេសកម្ពុជា យើងឃើញហើយ គាត់មកវិនិយោគ គាត់មកទេសចរ ដូច្នេះយើងជឿជាក់ថា គាត់អាចនឹងជួយជំរុញនៅពេលភាពរលត់នៃជំងឺរាតត្បាត ហើយយើងសង្ឃឹមថា គាត់នឹងនាំទេសចរមកកម្ពុជាខ្លាំងដូចមុន៕
ដកស្រង់៖ Freshnews
