ភ្នំពេញ ៖ កម្លាំងនគរបាលខណ្ឌដង្កោ បានស្រាវជ្រាវ ឃាត់ខ្លួនជនសង្ស័យបាន៦នាក់ ក្នុងករណីដែលជនសង្ស័យមួយក្រុមមានគ្នា៨នាក់ កាន់កាំបិតប៉័ងតោរត់សំដៅចូលទៅកាប់ជនរងគ្រោះ កាលពីថ្ងៃទី២៧ ខែតុលា ឆ្នាំ២០២១ វេលាម៉ោង១៩និង០០នាទី ។
ជនសង្ស័យដែលឃាត់ខ្លួនទាំង៦នាក់ រួមមាន ៖
ទី០១-ឈ្មោះ បាន ពេជ្រ ហៅ ទូ ភេទប្រុស អាយុ១៨ឆ្នាំ
ទី០២-ឈ្មោះ វ៉ាន់ លីវ៉ាយ ភេទប្រុស អាយុ១៨ឆ្នាំ
ទី០៣-ឈ្មោះ ភី វិបុល ហៅ បឿន ភេទប្រុស អាយុ១៨ឆ្នាំ
ទី០៤-ឈ្មោះ ធូ ចាន់រិទ្ធិសែម ភេទប្រុស អាយុ១៨ឆ្នាំ
ទី០៥-ឈ្មោះ គង់ កុសល ភេទប្រុស អាយុ១៨ឆ្នាំ
ទី០៦-ឈ្មោះ ឈៀង សីហា ភេទប្រុស អាយុ១៨ឆ្នាំ ។
វត្ថុតាងចាប់យករួមមាន ៖
១/ម៉ូតូម៉ាកស៊ុយស៊ូគីនិច ពណ៌លឿងលាយស ពាក់ស្លាកលេខភ្នំពេញ 1FI-2877 មានលេខម៉ាស៊ីន 314141 ចំនួន០១គ្រឿង
២/ម៉ូតូម៉ាកហុងដាសេ១២៥ ពណ៌ខ្មៅ គ្មានផ្លាកលេខ មានលេខតួ និងលេខម៉ាស៊ីន 8652002 ចំនួន០១គ្រឿង
៣/ទូរស័ព្ទដៃចំនួន០៣គ្រឿង (ម៉ាក IPHONE 6 ពណ៌ទឹកមាស០១គ្រឿង, IPHONE 5 ពណ៌ទឹកប្រាក់០១គ្រឿង, Redmi ពណ៌ខ្មៅ០១គ្រឿង) ត្រង់ចំណុចសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ យកមកធ្វើការសាកសួរនៅអធិការដ្ឋាននគរបាលខណ្ឌដង្កោ តាមនីតិវិធីច្បាប់ ។
តាមរបាយការណ៍របស់សមត្ថកិច្ចខណ្ឌដង្កោបានឲ្យដឹងថា កន្លងមកជនសង្ស័យនិងបក្ខពួកខាងលើ បានធ្វើសកម្មភាពកាប់ប្លន់យកស្លាកលេខម៉ូតូជាច្រើនលើកថែមទៀត ជាក់ស្តែង ៖
លើកទី១ នៅថ្ងៃទី១២ ខែតុលា ឆ្នាំ២០២១ វេលាម៉ោង១៣និង០០នាទី បានធ្វើសកម្មភាពកាប់ប្លន់យក្លាកលេខម៉ូតូ ភ្នំពេញ1CB-5670 ចំនួន០១ ជារបស់ជនរងគ្រោះឈ្មោះ ធីវ ចាន់រតនៈ ភេទប្រុស អាយុ១៦ឆ្នាំ និងបានកាប់បំផ្លាញម៉ូតូរបស់ជនរងគ្រោះឈ្មោះ ភ័ក្ត្រ សុផាត់ ភេទប្រុស អាយុ១៩ឆ្នាំ ធ្វើឱ្យខូចខាតទាំងស្រុង ត្រង់ចំណុចផ្ទះលេខ៣៥ ផ្លូវលេខ១៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
លើកទី០២ នៅថ្ងៃទី២៣ ខែតុលា ឆ្នាំ២០២១ វេលាម៉ោង១៧និង១០នាទី បានធ្វើសកម្មភាពកាប់បំផ្លាញម៉ូតូម៉ាកស៊ុយស៊ូគីនិច ពណ៌ស ពាក់ស្លាកលេខ ភ្នំពេញ 1IY-5167 មានលេខតួ និងលេខម៉ាស៊ីន 363558 របស់ជនរងគ្រោះ ទ្រី សុគន្ថា ភេទប្រុស អាយុ២២ឆ្នាំ ត្រង់ចំណុចផ្ទះលេខ៧២ ផ្លូវលេខ៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ ហើយជនរងគ្រោះខាងលើ ក៏បាននាំគ្នាមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដង្កោ ដើម្បីឱ្យសមត្ថកិច្ចធ្វើការស្រាវជ្រាវឃាត់ខ្លួនជនសង្ស័យ និងបក្ខពួក យកមកធ្វើការសាកសួរតាមនីតិវិធីច្បាប់ ។ ក្រោយពីមានចម្លើយសារភាពរបស់ជនសង្ស័យ ហើយមានការសម្របសម្រួលពីលោក សឿ ឡងឌី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានអនុញ្ញាតឱ្យសមត្ថកិច្ចចាត់ការតាមផ្លូវច្បាប់តែម្តង ។
លើកទី៣ កាលពីថ្ងៃទី២៥ ខែតុលា ឆ្នាំ២០២១ វេលាម៉ោង១៧និង០០នាទី ជនរងគ្រោះទី០១ឈ្មោះ សាត សំណេត ភេទប្រុស អាយុ១៦ឆ្នាំ ទី០២ឈ្មោះ យ៉ាន យ៉ាន់ ភេទប្រុស អាយុ១៧ឆ្នាំ បានជិះម៉ូតូ០១គ្រឿងម៉ាកហុងដាសេ១២៥ ពណ៌ខ្មៅ សេរីឆ្នាំ២០១៦ ពាក់ស្លាកលេខភ្នំពេញ 1BK-8868 មានលេខតួ និងលេខម៉ាស៊ីន8870052 ឌុបគ្នាទៅលេងបាល់ទះ នៅតារាងបាល់ហ្គាឡាក់ស៊ី ផ្លូវបេតុង ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ ពេលជនរងគ្រោះឌុបគ្នាទៅដល់ខាងមុខតារាងបាល់ទាត់ហ្គាឡាក់ស៊ី ស្រាប់តែមានជនសង្ស័យមួយក្រុមមានគ្នា០៨នាក់ ទី០១ឈ្មោះ វ៉ាន់ លីវ៉ាយ ភេទប្រុស អាយុ១៨ឆ្នាំ ទី០២ឈ្មោះ គង់ កុសល់ ភេទប្រុស អាយុ១៨ឆ្នាំ ទី០៣ឈ្មោះ ឈៀង សីហា ភេទប្រុស អាយុ១៨ឆ្នាំ និងបក្ខពួកចំនួន០៥នាក់ទៀត មិនស្គាល់ឈ្មោះ ជិះម៉ូតូ ចំនួន០៤គ្រឿង បានមកដល់ដែរ រួចជនសង្ស័យឈ្មោះ ឈៀង សីហា បានចុះពីលើម៉ូតូកាន់កាំបិតប៉័ងតោរត់សំដៅចូលទៅកាប់ជនរងគ្រោះឈ្មោះ យ៉ាន យ៉ាន់ រងរបួសត្រង់ចំង្កេះផ្នែកខាងក្រោយ ចំហៀងខាងស្តាំ (របួសធ្ងន់) និងកាប់ត្រូវជនរងគ្រោះឈ្មោះ សាត សំណេត រងរបួសស្មាខាងស្តាំមួយកាំបិត (របួសស្រាល) ហើយជនសង្ស័យ និងបក្ខពួក ថែមទាំងបានកាប់យកផ្លាកលេខម៉ូតូភ្នំពេញ 1BK-8868 របស់ជនរងគ្រោះឈ្មោះ សាត សំណេត ជិះគេចខ្លួនបាត់ ។ បន្ទាប់មកសមត្ថកិច្ចបានចុះទៅដល់កន្លែងកើតហេតុ នាំជនរងគ្រោះទាំង០២នាក់ ទៅព្យាបាលនៅក្លីនិកសួគ៌ា សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ រួចឈ្មោះ យឿន យ៉ាន ភេទប្រុស អាយុ៤១ឆ្នាំ (ត្រូវជាឪពុកបង្កើតរបស់ជនរងគ្រោះឈ្មោះ យ៉ាន យ៉ាន់) និងឈ្មោះ ស៊យ សាត ភេទប្រុស អាយុ៤១ឆ្នាំ (ត្រូវជាឪពុកបង្កើតរបស់ជនរងគ្រោះឈ្មោះ សាត សំណេត) បានមករាយការណ៍ និងដាក់ពាក្យបណ្តឹងប៉ុស្តិ៍នគរបាលរដ្ឋបាលដង្កោ ដើម្បីឱ្យសមត្ថកិច្ចជួយស្រាវជ្រាវរកជនសង្ស័យ យកមកធ្វើការ សាកសួរ និងចាត់ការតាមផ្លូវច្បាប់ ៕
ប្រភព៖ អគ្គស្នងការដ្ឋាននគរបាលជាតិ
