ភ្នំពេញ៖ ក្រសួងសុខាភិបាល ក៏ដូចជាក្រសួងការពារជាតិ បានចាប់ផ្តើមយុទ្ធធនាការចាក់វ៉ាក់សាំងកូវីដ១៩ ដូសជំរុញ (ដូសទី៣) ជូនប្រជាពលរដ្ឋកម្ពុជាហើយ។ ប៉ុន្តែនៅក្នុងនោះ ក៏មានការចោទជាសំនួរមួយពីសំណាក់ពលរដ្ឋដែលបានចាក់ វ៉ាក់សាំង២លើករួចមកហើយ ប៉ុន្តែបាត់កាត តើពួកគាត់ធ្វើយ៉ាងណាទើបអាចទទួលបានការចាក់វ៉ាក់សាំងលើកទី៣នេះ?
សម្រាប់បញ្ហាមួយនេះ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ក្នុងក្របខណ្ឌទូទាំងប្រទេស បានលើកឡើងនៅកាលពីថ្ងៃទី១១ ខែតុលា ឆ្នាំ២០២១ កន្លងទៅថា “រឿងកាតចាក់វ៉ាក់សាំងខ្ញុំធ្លាប់បានធ្វើការអំពាវនាវ ក៏ដូចជាណែនាំច្រើនលើកច្រើនសារដែរហើយ។ ហើយខ្ញុំក៏បានបញ្ជាក់ច្បាស់ទៀត សូមឲ្យបងប្អូនប្រជាពលរដ្ឋមានការថែរក្សានូវកាតវ៉ាក់សាំងនេះឲ្យបានល្អមែនទែន។ ពីព្រោះយើងមានកាតដូចជាប្រជាជន Passport ហើយឥឡូវនេះកាតវ៉ាក់សាំងនេះត្រូវរក្សាទុកដូចគ្នាអ៊ីចឹង ឲ្យវាល្អកុំឲ្យវាបាត់បង់។ប៉ុន្ដែនៅពេលមានការបាត់បង់ សូមបងប្អូននៅពេលលោកមកចាក់វ៉ាក់សាំង (ដូសទី៣) ពីព្រោះថាមុនពេលដែលចេញកាតគេមានប្រព័ន្ធរបស់គេ ទាំងខាងកងទ័ព ទាំងខាស៊ីវិល។ អ៊ីចឹងបើបងប្អូនធ្លាក់ចាក់ខាងកងទ័ព សូមអញ្ជើញទៅខាងកងទ័ព ទៅកន្លែងដែលបងប្អូនធ្លាក់ទៅចាក់ ដើម្បីទៅជម្រាបសួរនាំ ដើម្បីឲ្យគេឆែក មើលនៅក្នុងប្រព័ន្ធ ប្រសិនបើនៅក្នុងប្រព័ន្ធឃើញឈ្មោះបងប្អូនចាក់អីពិតប្រាកដ។ អ៊ីចឹងគេនឹងចាត់ចែងរៀបចំ ដើម្បីឲ្យមាន ដូចជាការបញ្ជាក់ ឬក៏អាចថានៅពេលដែលបងប្អូនទទួលបានដូសជំរុស (ដូសទី៣)។
ក្នុងនោះលោកជំទាវ បានបន្ថែមទៀតថា បងប្អូនដែលមានតម្រូវការចាក់វ៉ាក់សាំងហើយនេះ យើងក៏មិនឲ្យមានការរាំងស្ទះដែរ អ៊ីចឹងអ្វីដែលសំខាន់គឺសូមបងប្អូនទៅកាន់ទីតាំងចាក់វ៉ាក់សាំង ហើយសូមឲ្យក្រុមគ្រូពេទ្យ ឡើងមើលលើប្រព័ន្ធអីឲ្យបានត្រឹមត្រូវ ប្រសិនបើឃើញឈ្មោះបងប្អូន ថាពិតប្រាកដជាបានចាក់វ៉ាសាំងដូសទី១ ដូសទី២មានថ្ងៃខែអីត្រឹមត្រូវហើយ ក្រុមគ្រូពេទ្យនឹងមានការសម្រេចដើម្បីចាក់ដូសទី៣ ជូនបងប្អូន។ ហើយអាចនៅពេលនោះ ប្រសិនបើមានការសម្រេចថាត្រូវជូនកាតថ្មី យើងជូន តែបើត្រូវបញ្ជាក់ ឬរង់ចាំការណែនាំអីម៉េចទៀត យើងនឹងណែនាំបន្ថែមទៀត៕
