កំពង់ស្ពឺ៖ កាលពីវេលាម៉ោង ២២ និង ៣២ នាទី ថ្ងៃទី១៥ ខែតុលា ឆ្នាំ២០២១ នៅលើកំណាត់ផ្លូវជាតិលេខ៤ ចន្លោះ គីឡូម៉ែត្រលេខ៩៩ និង ១០០ ត្រង់ចំណុច ភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ មានហេតុការណ៍រថយន្តវេអងសណ្តោងរ៉ឺម៉ក១គ្រឿង បើកជ្រុលទៅបុកគូទរថយន្តដឹកទំនិញ១គ្រឿងទៀត បណ្តាលឲ្យរងរបួសធ្ងន់ ២ នាក់ស្រាល ២នាក់ ហើយជ្រុលទៅបុកតូបលក់ដូរមួយកន្លែងទៀតធ្វើនៅជាប់ចិញ្ចើមផ្លូវ។
បើតាមប្រភពពីកន្លែងកើតហេតុបានអោយដឹងថារថយន្តបង្កម៉ាក DAEWOO ពណ៍ទឹកប្រាក់ ខៀវលាយស ពាក់ស្លាកលេខភ្នំពេញ 3E-6189 សណ្តោង រុឺម៉កពាក់ស្លាកលេខ ភ្នំពេញ 4A-9019 (តៃកុងមិនស្គាល់អត្តសញ្ញាណចុះរត់បាត់ស្រមោល) បើកបរពី ទិសដៅពីរលិចទៅកើត មកដល់ចំណុចកើតហេតុ ខាងលើ បានជ្រុលទៅបុកគូទរថយន្តមួយគ្រឿង ម៉ាក HYUNDAI ពណ៍ស ពាក់ស្លាកលេខភ្នំពេញ 3A-9312 បើកបរដោយឈ្មោះ សែត ចំរើន អាយុ ៣៧ឆ្នាំ ទៅលំនៅ នៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ នឹងអ្នករួមដំណើរឈ្មោះ អឿន សាន អាយុ ២៨ឆ្នាំ នៅភូមិត្រពាំងឆ្កួន ឃុំព្រៃក្រសាំង ស្រុកឱដ្តុង ខេត្ត កំពង់ស្ពឺ ។
ក្រោយកើតហេតុ អ្នករបួសខាងលើត្រូវបានដឹកយកទៅព្យាបាលនៅមន្ទីរពេទ្យខេត្តកំពង់ស្ពឺ ។ រីឯរថយន្តទាំងពីរគ្រឿង ត្រូវបានស្ទួចយកមករក្សាទុកនៅផ្នែកចរាចរណ៍ផ្លូវគោក នៃ អធិការដ្ឋាននគរបាលស្រុកភ្នំស្រួចដើម្បីចាត់ការទៅតាមនីតិវិធី៕
ប្រភព៖ សហការី
