ភ្នំពេញ៖ អធិការនគរបាលក្រុងបាត់ដំបង លោកវរសេនីយ៍ឯក ពេជ្រ សារ៉ែន កាលពីព្រឹកថ្ងៃទី១៤ ខែកក្កដា ឆ្នាំ២០២១ បានដឹកនាំកម្លាំងនគរបាល ធ្វើការស្រាវជ្រាវស៊ើបអង្កេត និងឃាត់ខ្លួនជនសង្ស័យចំនួន ៣នាក់នៅចំណុចភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង ពាក់ពន្ធ័ករណីអំពើលួចមានស្ថានទម្ងន់ទោស (កាច់សោលួចយកម៉ូតូ) ។
ប្រតិបត្តិការនេះធ្វើឡើងដោយ អនុវត្តតាមបទបញ្ជារបស់លោកឧត្ដមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ព្រមទាំងយោបល់របស់លោកវរសេនីយ៍ឯក លឹម ពុទ្ធីឡាស្នងការរងផែនការងារនគរបាលព្រហ្មទណ្ឌ និងដោយបានការសម្របសម្រួល លើនីតិវិធីពីលោក កែវ សុជាតិ ព្រះរាជអាជ្ញានៃអយ្យការ អមសាលាដំបូងខេត្តបាត់ដំបង ។
ជនសង្ស័យទាំង ៣នាក់នោះរួមមាន៖ ១.ឈ្មោះ ហែម សុខខេត ភេទប្រុស អាយុ ៣៨ឆ្នាំ មានទីលំនៅភូមិអណ្ដូងប្រេង ឃុំក្រាំងលាវ ស្រុកទឹកផុស ខេត្តកំពង់ឆ្នាំង ។ ២.ឈ្មោះ អ៊ុន បឿក ភេទប្រុស អាយុ ១៩ឆ្នាំ មានទីលំនៅបន្ទប់ជួល សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ៣.ឈ្មោះ ហែម វណ្ណ: ភេទប្រុស អាយុ ១៨ឆ្នាំ មានទីលំនៅបន្ទប់ជួល សង្កាត់សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
សម្ភារៈដកហូតបានរួមមាន៖ ម៉ូតូម៉ាកហុងដាឌ្រីម សេរីឆ្នាំ២០១៥ ចំនួន ១គ្រឿង ដែលជិះដឹកគ្នាទម្លាក់ធ្វើសកម្មភាព, ទូរសព្ទដៃម៉ាក់ Nokia អិនចុចពិលចំនួន ៤គ្រឿង, កូនសោរម៉ូតូចម្លងរួចចំនួន ៧កូនសោរ ដង្កាប់ចំនួន ១, ទូណឺវីសចំនួន ២, ស្គុតកាត់លេខ៨ ចំនួន ២, កាបូបដាក់ក្រវ៉ាត់ចង្កេះចំនួន ២, ស្រោមដៃចំនួន១, កូនសោរលេខ៨ ចំនួន ១ ។
សូមជម្រាបជូនថា កាលពីថ្ងៃទី១០ ខែកក្កដា ឆ្នាំ២០២១ វេលាម៉ោង១៨និង៤៥នាទី ចំណុចក្រុមទី២ ភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ជនសង័្សយមិនស្គាល់អត្តសញ្ញាណ បានធ្វើសកម្មភាពកាច់សោលួចយកម៉ូតូ របស់ជនងគ្រោះឈ្មោះ ស៊ាញ ម៉ាញ ភេទប្រុស អាយុ ៣៧ឆ្នាំ មានទីលំនៅភូមិបែកចានថ្មី សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង ។ ភិនភាគម៉ូតូបាត់បង់គឺ ម៉ាក់ហុងដាឌ្រីម សេរីឆ្នាំ២០២០ ពណ៍ខ្មៅ ពាក់ស្លាកលេខ ភ្នំពេញ 1AL-3364 លេខតួ 5831929 ។
នៅក្រោយពេលកើតហេតុ ជនរងគ្រោះបានដាក់ពាក្យបណ្តឹង ចូលមកសមត្ថកិច្ចនគរបាលក្រុងបាត់ដំបង ហើយបន្ទាប់ពីទទួលបានពាក្យបណ្តឹងនេះ សមត្ថកិច្ចបានធ្វើការស្រាវជ្រាវ រហូតកំណត់បាននូវមុខសញ្ញានេះ និងឈានដល់ការឃាត់ខ្លួនបានតែម្តង។
នៅចំពោះមុខសមត្ថកិច្ច ជនសង្ស័យបានសារភាពថា ពួកខ្លួនពិតជាបានធ្វើសកម្មភាព កាច់សោលួចយកម៉ូតូ នាពេលកន្លងទៅនៅក្នុងខេត្តបាត់ដំបងប្រាដកមែន ពិសេសគឺក្រុងបាត់ដំបងនិងស្រុកបាណន់ ។ ក្នុងសេចក្តីសារភាព របស់ជនសង័្សយខាងលើនេះ បានបញ្ជាក់ថា ក្នុងរយៈពេលកន្លងទៅបក្សពួកខ្លួន ធ្លាប់បានលួចកាច់សោយកម៉ូតូមិនតិចជាង ២០គ្រឿងនោះទេ នៅក្រុងបាត់ដំបង និងស្រុកបាណន់ ហើយពេលលួចបានក្រុមនេះ ជិះម៉ូតូនោះដោយផ្ទាល់យកទៅភ្នំពេញ តែពេលទៅដល់ម្តុំផ្សារឧត្តុង្គ មានបក្សពួកផ្សេងទៀតនៅចាំ ទទួលយកបន្តនៅទីនោះយកទៅភ្នំពេញ ។
បច្ចុប្បន្នជនសង្ស័យ និងវត្ថុតាងនគរបាលក្រុងកំពុងរៀបចំ សំណុំរឿងបញ្ជូនមកការិយាល័យ ជំនាញអនុវត្តតាមច្បាប់ ៕
