ភ្នំពេញ៖ ខឹងបបួលទៅដើរលេងជាមួយមិនបាន បុរសសតិមិនគ្រប់ម្នាក់ទាញចបកាប់ វាយសម្លាប់ស្ត្រីសតិមិនគ្រប់ម្នាក់ រួចដើរចូលប៉ុស្តិ៍ប៉ូលិស ។ ករណីនេះបានបង្កការភ្ញាក់ផ្អើល កាលពីព្រឹកថ្ងៃទី២៩ ខែមិថុនា ឆ្នាំ២០២១ ត្រង់ចំណុចផ្ទះទុកចោលមួយកន្លែង ឋិតនៅក្នុងភូមិតាស្តារឃុំតាស្តារ ស្រុកសំពៅលូន ខេត្តបាត់ដំបង។
ជនដៃដល់មានឈ្មោះ វិត អាយុជាង២០ឆ្នាំ រស់នៅចល័តមិនពិតប្រាកដ ។
ក្រោយដើរចូលឲ្យសមត្ថកិច្ចឃាត់ខ្លួន ជនសង្ស័យបានសារភាពថា នៅថ្ងៃកើតហេតុខ្លួនបានបបួលស្ត្រីជាដៃគូឈ្មោះ ប៉ែត រ័ត្ន ដែលមានសតិមិនគ្រប់ដូចគ្នា ទៅដើរលេងនិងទៅបេះត្រប់ដែលនៅក្បែរនោះ ប៉ុន្តែជនរងគ្រោះបានបដិសេធមិនព្រមទៅជាមួយ ក៏កើតចិត្តខឹង ហើយបានទាញចបកាប់វាយសំពង ទៅលើស្ត្រីជនរងគ្រោះផ្ទួនៗ រហូតស្លាប់រួចបានអូសសពទៅក្នុងផ្ទះទុកចោល ១កន្លែង ដែលជាទីជម្រករបស់ជនរងគ្រោះតែម្តង។
ក្រោយកើតហេតុភ្លាមៗ នគរបាលជំនាញស្រុកសំពៅលូន បានចុះទៅពិនិត្យសាកសពជនរងគ្រោះ និងបាននាំខ្លួនជនដៃដល់ ទៅអធិការដ្ឋាននគរបាលស្រុក ដើម្បីសាកសួរបន្ថែម និងបន្តនីតិវិធីទៅតាមផ្លូវច្បាប់ ៕
