ភ្នំពេញ៖ គ្រាន់តែប្រពន្ធ និងប្ដីចុង មកសុំយកកូនស្រី ដែលប្ដីដើមនាំមកលេងបាត់ដំណឹងជាច្រើនថ្ងៃ ត្រឡប់ទៅផ្ទះវិញ ត្រូវប្ដីដើមដកកាំភ្លើងខ្លីភ្ជង់ក្បាល គំរាមរកបាញ់សម្លាប់ប្តីចុង ។ ហេតុការណ៍នេះ បានបង្កការភ្ញាក់ផ្អើល កាលពីម៉ោង ១១៖៤០នាទីព្រឹក ថ្ងៃទី២៤ ខែមិថុនា ឆ្នាំ២០២១ ស្ថិតនៅចំណុចភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
ស្ត្រីជាប្រពន្ធមានឈ្មោះ គួង រ៉ាទី អាយុ ៣០ឆ្នាំ មុខរបរលក់អីវ៉ាន់។ ចំណែកប្តីចុងមានឈ្មោះ ចន ម៉េងហ៊ាវ អាយុ២៨ឆ្នាំ មុខរបរលក់អីវ៉ាន់ ស្នាក់នៅផ្លូវវេងស្រេង សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ រីឯបុរសជាប្តីដើមឈ្មោះ គង់ សារ៉ុន អាយុប្រហែលជាង៣០ឆ្នាំ មុខរបរមន្ត្រីយោធា ស្នាក់នៅក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
បើតាមសម្ដីប្តីចុង បានប្រាប់ឱ្យដឹងថា មុនពេលកើតហេតុ ពួកគាត់បានធ្វើដំណើរចេញពីផ្ទះ ដើម្បីមកយកកូនស្រីដែល កំពុងរស់នៅជាមួយអតីតប្តី ដោយបានសុំយកកូនស្រីមកលេងផ្ទះរបស់ខ្លួន ហើយមានរយៈពេលជាច្រើនថ្ងៃមកហើយ មិនឃើញកូនស្រីត្រឡប់ទៅផ្ទះវិញ។ លុះមកដល់ថ្ងៃទី២៤ ខែមិថុនា ឆ្នាំ២០២១នេះ រូបខ្លួននិងប្រពន្ធបាននាំគ្នា មកយកកូនស្រីដើម្បីត្រឡប់ទៅផ្ទះវិញ។ ខណៈពេលទៅដល់ក៏បាន ជួបជាមួយនឹងប្រពន្ធរបស់អតីតប្តីប្រពន្ធខ្លួន រួចក៏បាននិយាយប្រាប់ថា ពួកខ្លួនមកសុំយកកូនស្រី របស់ខ្លួនត្រឡប់ទៅផ្ទះវិញ តែភ្លាមៗនោះ ប្រពន្ធអតីតប្តីក៏បានប្រាប់ថា ចាំខ្លួនទៅនិយាយជាមួយប្តីសិន។ ក្រោយមក អតីតប្តី ក៏បានហៅអតីតប្រពន្ធឲ្យចូលទៅខាងក្នុងផ្ទះ ស្រាប់តែពេលនោះប្រពន្ធ របស់អតីតប្តីបានបិទទ្វាររបងចាក់សោ រួចអតីតប្តីក៏បានទាញកាំភ្លើង មកភ្ជង់ក្បាលរបស់ខ្លួនដែលជាប្តីចុង ដោយបានគំរាមសម្លាប់ចោលតែម្តង។ ក្រោយពីបានឮសម្តីនេះរួចមក ពួកខ្លួនក៏បាននាំគ្នារត់ចេញពីក្នុងផ្ទះ និងបានរាយការណ៍ ទៅកាន់អាជ្ញាធរមូលដ្ឋាន ដើម្បីឲ្យចុះមកជួយធ្វើអន្តរាគមន៍។ ពេលទទួលបានដំណឹងនេះភ្លាម កម្លាំងសមត្ថកិច្ចប៉ុស្តិ៍ឫស្សីកែវ បានចុះទៅដល់ទីតាំងដើម្បី ធ្វើការសម្របសម្រួលគ្នា ៕
