ភ្នំពេញ៖ បុរសម្នាក់ជក់គញរឿងញៀនលើសកម្រិត ព្រឹកឡើងស្រែកជេរអ្នកជិតខាង ថ្ងៃឡើងយកកែវគប់ចូលផ្ទះ ស្រាប់តែពេលយប់កាន់ដាវស្រែកថា អញនឹងកាប់ពួកឯងឲ្យងាប់ រួចក៏រត់ចូលទៅកាប់បំផ្លាញទ្រព្យសម្បត្តិ ជនរងគ្រោះតែម្ដង ។ ករណីនេះកើតឡើងកាលពីម៉ោង ៧៖៣០នាទីយប់ ថ្ងៃទី២០ ខែមិថុនា ឆ្នាំ២០២១ នៅចំណុចក្នុងបុរីពិភពថ្មី៣ នៅភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល។
ជនរងគ្រោះមានឈ្មោះ ស៊ន ឆៃលីម ភេទប្រុសអាយុ២៩ឆ្នាំជនជាតិខ្មែរ មុខរបរលក់ដូរ នៅភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល។ ចំណែកជនសង្ស័យឈ្មោះ លី ពិទូ ភេទប្រុសកើតឆ្នាំ១៩៩៤ ជនជាតិខ្មែរមុខរបរមិនពិត នៅភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល (ឃាត់ខ្លួន)។
ផល់ប៉ះពាល់រួមមាន៖ បែកកញ្ចក់ទ្វារផ្ទះចំនួន១ផ្ទាំង, បែកចានចំនួន៤ ។ វត្ថុតាងចាប់យករួម៖ អាវុធកែច្នៃ(ដាវ)ចំនួន១ ប្រវែង០,៩០ម៉ែត្រ។
នៅមុនពេលកើតហេតុ វេលាម៉ោង ៦និង៣០នាទីព្រឹក ពេលជនរងគ្រោះក្រោកពីគេង ស្រាប់តែឃើញជនសង្ស័យឈរនៅមុខផ្ទះហើយបាន ស្រែកជេរប្រមាថលើគ្រួសារជនរងគ្រោះ បន្ទាប់ពីជេរហើយជនសង្ស័យក៏ចូលក្នុងផ្ទះវិញ។ រហូតដល់ម៉ោង ១៤និង២០នាទី ជនសង្ស័យបានចេញពីក្នុងផ្ទះមក ហើយបានស្រែកជេរប្រមាថ និងយកកែវចំនួន ១គុបចូលផ្ទះជនរងគ្រោះហើយក៏ចូលក្នុងផ្ទះវិញបាត់ទៀត។
រហូតដល់វេលាម៉ោងកើតហេតុ ពេលជនរងគ្រោះនិងក្រុមគ្រួសារកំពុងហូបបាយខាងមុខផ្ទះ ស្រាប់តែឃើញជនសង្ស័យមានកាន់ដាវមួយដើម បានដើរសំដៅទៅផ្ទះជនរងគ្រោះ ដោយគ្រួសារជនរងគ្រោះឃើញសភាពបែបនោះ បាននាំគ្នារត់ចូលក្នុងផ្ទះហើយចាក់សោទ្វារ ។ ពេលនោះជនសង្ស័យបានស្រែកថា អញនឹងកាប់ពួកឯងឲ្យងាប់ បន្ទាប់មកជនសង្ស័យបានយកដាវកាប់តុនិងចាន និងកាប់កញ្ចក់ទ្វារផ្ទះរបស់ជនរងគ្រោះចំនួន ១ផ្ទាំង ទើបជនរងគ្រោះបានទូរស័ព្ទរាយការណ៍ មកសមត្ថកិច្ចឲ្យជួយអន្តរាគមន៍ ។
ក្រោយពីទទួលបណ្ដឹងពីជនរងគ្រោះតាមរយៈទូរស័ព្ទដៃ ហើយកម្លាំងសមត្ថកិច្ចជំនាញស្រុក និងកម្លាំងប៉ុស្ដិ៍បែកចាន បានចុះដល់កន្លែងកើតហេតុ ហើយឃាត់ខ្លួនជនសង្ស័យរួមជាមួយវត្ថុតាង។
ជនសង្ស័យបានសារភាពថា៖ ខ្លួនបានប្រើប្រាស់សារធាតុញៀន ច្រើនលើសកម្រិត ទើបមានអារម្មណ៍វិលវល់ ហើយបានយកដាវទៅដេញកាប់ ជនរងគ្រោះ និងកាប់បំផ្លាញទ្រព្យសម្បត្តិ របស់ជនរងគ្រោះឱ្យខូចខាត ។
ចំពោះករណីខាងលើនេះ កម្លាំងជំនាញកំពុងកសាង សំណុំរឿងបន្តតាមនីតិវិធី ៕
