ភ្នំពេញ៖ បុរសមានជំងឺសរសៃប្រសាទប្រចាំកាយម្នាក់ បានធ្វើអត្តឃាតចងក នៅលើដើមធ្លកមានកំពស់០២,៣០ម៉ែត្រ ដោយប្រើខ្សែលីឡុងពណ៌ស ស្ថិតនៅចំណុចទួលខ្មោច ភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ នៅខាងលិចផ្ទះមានចម្ងាយប្រមាណ២៥០ម៉ែត្រ កាលពីវេលាម៉ោង១០និង៣០នាទីថ្ងៃទី១១ ខែមិថុនា ឆ្នាំ២០២១។
តាមប្រភពដែលត្រូវជាសាច់ញាតិនៃជនរងគ្រោះ បានប្រាប់អោយដឹងថា ជនរងគ្រោះមានឈ្មោះ ម៉ិល ឆើត អាយុ៣៨ឆ្នាំ ជាបុរសពោះម៉ាយ សព្វថ្ងៃមកស្នាក់នៅជាមួយប្អូនស្រីបង្កើត អស់រយៈពេល០៦ខែមកហើយ ទើបមកដល់ថ្ងៃកើតក៏បាត់ជនរងគ្រោះ មិនដឹងទៅណា ស្រាប់តែប្រទះឃើញចងកស្លាប់នៅនឹងដើមធ្លក ក៏មានការភ្ញាក់ផ្អើល ហើយក៏រាយការណ៍ជូនសមត្ថកិច្ចមកធ្វើការពិនិត្យកន្លែងកើតហេតុ ។ ប្រភពបានបញ្ជាក់បន្ថែមថា ជនរងគ្រោះគឺធ្លាប់មានជំងឺសរសៃប្រសាទយូរណាស់មកហើយ ។
លោកវរសេនីយ៍ទោ ជួន ពិសិដ្ឋ អធិការរង នៃអធិការដ្ឋាននគរបាលស្រុកក្រគរ បានបញ្ជាក់អោយដឹងថា ក្រោយការពិនិត្យនិងការធ្វើកោសល្យវិច្ឆ័យរបស់គ្រូពេទ្យ នឹងសមត្ថកិច្ចជំនាញ ឃើញថា នៅកន្លែងកើតហេតុ នឹងសាកសពជនរងគ្រោះ គឺពុំមានស្លាកស្នាមអ្វីគួរអោយសង្ស័យ ហើយគ្រូពេទ្យជំនាញបានសន្និដ្ឋានថា ជនរងគ្រោះពិតជាបានស្លាប់បណ្តាលមកពីចងក ធ្វើអត្តឃាតខ្លួនឯងប្រាកដមែន ។
លោកអធិការរង បានបន្តថា ក្រោយធ្វើការពិនិត្យសាកសពរួច សមត្ថកិច្ចបានប្រគល់សាកសពជនរងគ្រោះជូនទៅក្រុមគ្រួសារធ្វើបុណ្យតាមប្រពៃណី ៕
