ភ្នំពេញ៖ រថយន្តធំបើកថយក្រោយ បានបុកជណ្តើរផ្ទះរលំសង្កត់ក្មេងៗ បណ្ដាលឱ្យស្លាប់ម្នាក់ និងរបួសធ្ងន់៤នាក់ នៅភូមិកណ្តាល ឃុំកោះចូរ៉ាម ស្រុកខ្សាច់កណ្តាល ខេត្តកណ្តាល កាលពីរសៀលថ្ងៃទី៨ ខែមិថុនា ឆ្នាំ២០២១។
ក្មេងស្រីដែលស្លាប់ឈ្មោះ សំណាង សុម៉ាវត្តី អាយុ៦ឆ្នាំ។ ក្មេងរងរបួស៤នាក់,ឈ្មោះ សំណាង បញ្ញា ភេទប្រុស អាយុ៧ឆ្នាំបែកក្បាល, ឈ្មោះ យ័ន រក្សា ភេទស្រី អាយុ១០ឆ្នាំ បែកក្បាល, ឈ្មោះ វិទ្ធី សុខឃឹម ភេទស្រី អាយុ៦ឆ្នាំ របួសបែកចំគល់ចិញ្ចើម, ឈ្មោះ វិទ្ធី វណ្ណឌី ភេទប្រុស អាយុ៧ឆ្នាំ របួសស្រាលក្មេងរងគ្រោះទាំង ៥នាក់រស់នៅជាមួយគ្នាក្នុង ភូមិកណ្តាលឃុំកោះចូរ៉ាម ។
រថយន្តបង្កម៉ាកហីណូ ប្រភេទបែន៥តោន ពាក់ផ្លាកលេខ ក្រចេះ 3A-0312 អ្នកបើកបរឈ្មោះ កិះ កយ ភេទប្រុស អាយុ ៣៨ឆ្នាំនៅ ភូមិកណ្តាល ឃុំស្រុកកោះចូរ៉ាម ស្រុកខ្សាច់កណ្តាល ខេត្ត កណ្តាលបានរត់គេចខ្លួន ។ រថយន្តនេះបានថយក្រោយ ចាក់ដីជ្រុលទៅបុកជណ្តើរថ្មផ្ទះ របស់ឈ្មោះ នៅ សំណាង អាយុ៣៣ឆ្នាំ បាក់រលំសង្កត់ក្មេងស្លាប់ និងរបួសធ្ងន់តែម្តង ។
សម្ភារខូចខាតរថយន្ត ១គ្រឿង-ម៉ូតូ ១គ្រឿង-កង់១គ្រឿង។ តាមការសន្និដ្ឋាន អ្នកបើកបររថយន្តបង្ក បើកបរថយក្រោយខ្វះការប្រុងប្រយ័ត្ន។ ក្រោយកើតហេតុនគរបាលចរាចរណ៍ បានចុះពិនិត្យវាស់វែង និងយករថយន្តទៅរក្សាទុក នៅអធិការដ្ឋាននគរបាលស្រុកខ្សាច់កណ្តាល រង់ចាំដោះស្រាយពេលក្រោយ ៕
