ភ្នំពេញ៖ បុរសម្នាក់ រត់គេចចេញពីមណ្ឌលចត្តាឡីស័ក តែអកុសលត្រូវរថយន្ត បុកស្លាប់ភ្លាមៗនៅហ្នឹងកន្លែងកើតហេតុតែម្ដង ។ ហេតុការណ៍នេះ កើតឡើងកាលពីយប់ នៅថ្ងៃទី១ ខែមិថុនា ឆ្នាំ២០២១ នៅចំណុចវត្តពពេចនៅលើផ្លូវលេខ៥៥ ស្ថិតនៅក្នុងភូមិក្របៅជ្រុំ ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ ។
ជនរងគ្រោះខាងលើមានឈ្មោះ ឡាយ សុខាន់ភេទប្រុសអាយុ ៣៣ ឆ្នាំរស់នៅក្នុងភូមិក្រូចឆ្មារឃុំលាចស្រុកភ្នំក្រវាញ ខេត្តពោធិ៍សាត់ បានរត់គេចចេញពីមណ្ឌលចត្តាឡីស័ក ដែលមានទីតាំងនៅឃុំបាក់ចិញ្ចៀន រួចដើរតាមបណ្ដោយផ្លូវលេខ ៥៥ ឆ្ពោះទៅទិសខាងត្បូង មកដល់ចំណុចកើតហេតុខាងលើ ត្រូវបានរថយន្តមិនស្គាល់ម៉ាក បានបុកចំពីមុខបណ្ដាលឱ្យជនរងគ្រោះ ស្លាប់នៅហ្នឹងកន្លែងកើតហេតុ រីឯអ្នកបើកបរបានបើករថយន្តគេចខ្លួនបាត់។ ជនរងរូបនេះធ្លាប់ប្រើប្រាស់ នូវសារធាតុញៀនផងដែរ ។ ចំពោះសាកសពសមត្ថកិច្ច បានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕
