ភ្នំពេញ៖ ស្រីស្រស់ប្រុសស្អាត ១គូ បានបើករថយន្តគេចគោលដៅ កំពុងអនុវត្តបំរាមគោចរ ហើយព្យាយាមបើករត់ ត្រូវសមត្ថកិច្ចជិះដេញតាមឃាត់ ។ ហេតុការណ៍នេះ កើតឡើងកាលពីម៉ោង៩យប់ ថ្ងៃទី៩ ខែឧសភា ឆ្នាំ២០២១ ត្រង់ចំណុចស្តុបបូកគោ តាមបណ្ដោយផ្លូវព្រះមុនីវង្ស សង្កាត់ទន្លេបាសាក់ ខណ្ឌចំការមន។
បើតាមប្រភពព័ត៌មាន បានឲ្យដឹងថា មុនពេលកើតហេតុ កម្លាំងសមត្ថកិច្ចនៃអធិការដ្ឋាននគរបាលខណ្ឌចំការមន បានដាក់គោលដៅអនុវត្តបំរាមគោចរត្រង់ចំណុចរង្វង់មូលផ្សារដើមថ្កូវ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។ លុះដល់វេលាកើតហេតុ ក៏មានរថយន្តមួយគ្រឿងម៉ាកហ្វតរ៉ែនជ័រ ពណ៌ស ពាក់ស្លាកលេខ ភ្នំពេញ 2BH-6799 ដែលបើកបរដោយបុរសម្នាក់ និងស្ត្រីម្នាក់ជាអ្នករួមដំណើរជាមួយ បានធ្វើដំណើរតាមបណ្ដោយផ្លូវ១៦៣ ក្នុងទិសដៅពីជើងទៅត្បូង ដោយបើកឆ្លងកាត់គោលដៅដែលសមត្ថកិច្ចកំពុងតែអនុវត្ត ។
ខណៈពេលនោះ សមត្ថកិច្ចក៏បានហៅរថយន្តនោះឲ្យឈប់
ដើម្បីសុំត្រួតពិនិត្យលិខិតធ្វើដំណើរ ប៉ុន្តែរថយន្តនោះមិនបានឈប់ទេ បែរជាព្យាយាមបើករត់គេចចេញពីគោលដៅតែម្តង។ ភ្លាមៗនោះសមត្ថកិច្ចក៏បានជិះម៉ូតូដេញតាមពីក្រោយរថយន្តរហូតដល់ចំណុចខាងលើ ទើបអាចធ្វើការស្ទាក់ចាប់បាន។
ក្រោយកើតហេតុ រថយន្តរួមទាំងអ្នកបើកបរ និងអ្នករួមដំណើរ ត្រូវបានសមត្ថកិច្ចនាំទៅកាន់ អធិការដ្ឋាននគរបាលខណ្ឌចំការមន ដើម្បីសាកសួរ និងអនុវត្តទៅតាមនីតិវិធី៕
