ភ្នំពេញ៖ ដោយសង្កេតឃើញ ព្រឹត្តិការណ៍សហគមន៍២០កុម្ភៈ ដែលមានរយៈជិត២ខែទៅហើយនោះ មិនទាន់មានសញ្ញាណ ថមថយនៅឡើយនោះ ហើយការរីករាលកាន់ធ្ងន់ធ្ងរ ពីមួយថ្ងៃទៅមួយថ្ងៃសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអង្វរប្រជាពលរដ្ឋខ្មែរឱ្យរួមគ្នា ដើម្បីយកឈ្នះលើព្រឹត្តិការណ៍ដ៏គ្រោះថ្នាក់សម្រាប់កម្ពុជាមួយនេះបើមិនដូច្នោះទេ យើងនឹងឈានទៅរក មរណៈពិតប្រាកដ។
ក្នុងសារសំឡេងពិសេស ស្តីពីវិធានបិទខ្ទប់ រាជធានីភ្នំពេញ និងក្រុងតាខ្មៅនៅយប់ថ្ងៃទី១៤ ខែមេសា ឆ្នាំ២០២១នេះ សម្តេចតេជោ ហ៊ុន សែន បានថ្លែងថា«សូមអង្វរកបងប្អូន ប្រជាពលរដ្ឋ របស់យើងខិតខំ ឡើងរួមគ្នា ដើម្បីបញ្ចប់នូវព្រឹត្តិការណ៍ ដ៏គ្រោះថ្នាក់។ យើងកំពុងស្ថិតនៅមាត់ជ្រោះ នៃមរណៈហើយ ប្រសិនបើយើងមិនប្រឹងរួមគ្នា យើងនឹងឈានទៅរកមរណៈពិតប្រាកដ។ ដូច្នេះវិធីតែមួយគត់ គឺរួមដៃគ្នាទាំងរដ្ឋ និងប្រជាជន»។
របាយការណ៍ របស់ក្រសួងសុខាភិបាល បានបង្ហាញថា ក្នុងព្រឹត្តិការណ៍នេះ មានមនុស្សសរុប ៤,៣៣៧នាក់ហើយ បានឆ្លងកូវីដ១៩ ហើយមនុស្សរហូតដល់ទៅ ៣៦នាក់ បានស្លាប់បាត់ជីវិត គិតត្រឹមថ្ងៃទី១៤ ខែមេសា ឆ្នាំ២០២១។
នៅយប់ថ្ងៃទី១៤ ខែមេសា ដដែលនេះ រាជរដ្ឋាភិបាលបានដាក់ចេញវិធានការថ្មីមួយទៀត ដោយបិទខ្ទប់រាជធានីភ្នំពេញ និងក្រុងតាខ្មៅរយៈពេល១៤ថ្ងៃ គិតចាប់ពីម៉ោងសូន្យថ្ងៃទី១៥ ខែមេសានេះទៅ ដើម្បីទប់ស្កាត់ការរីករាលដាលជំងឺកូវីដ១៩។
វិធានការបានហាមឃាត់ ប្រជាពលរដ្ឋមិនឱ្យចេញពីផ្ទះ និងបិទអាជីវកម្មនានាផងដែរ។ ទោះបីយ៉ាងណា វិធានការបានអនុញ្ញាតសម្រាប់ការធ្វើដំណើរចាំបាច់ដូចជាការទៅមន្ទីរពេទ្យ និងការទិញម្ហូបអាហារជាដើម។ ដោយឡែកអាជីវកម្មចាំបាច់មួយចំនួន ក៏ត្រូវបានរក្សាទុកផងដែរ ជាពិសេសអាជីវកម្មពាក់ព័ន្ធការលក់ដូរ ឬផ្គត់ផ្គង់ស្បៀងអាហារ ៕
