ភ្នំពេញ៖ បុរសម្នាក់ខឹងសុំត្រូវរ៉ូវគ្នា ជាមួយអតីតប្រពន្ធវិញមិនបាន ក៏ផ្ទុះកំហឹងបើកកង់បីដេញបុកមិនអស់ចិត្ត ចុះទាញកាំបិតដេញចាក់ប្រពន្ធថែមទៀត បណ្ដាលឲ្យរងរបួសជាទម្ងន់ ។ ហេតុការណ៍នេះបានកើតឡើងកាលពីម៉ោង ៩៖៣០នាទីយប់ថ្ងៃទី៦ ខែមេសា ឆ្នាំ២០២១ ស្ថិតនៅមុខកន្លែងលក់ផ្លែឈើផ្សារលើធំថ្មី ក្នុងភូមិដកពោធិ សង្កាត់ស្លក្រាម ក្រុង/ខេត្តសៀមរាប។
បើតាមសាក្សីដែលឃើញហេតុការណ៍នេះបានឲ្យដឹងថា មុនកើតហេតុពួកគាត់ឃើញបុរសម្នាក់បានអង្គុយក្នុងPassAPP ដែលចតនៅមុខកន្លែងលក់ផ្លែឈើផ្សារលើធំថ្មី ខណៈពេលនោះឃើញមានស្ត្រីម្នាក់និងក្មេងស្រីម្នាក់ជិះម៉ូតូ មកកន្លែងលក់ផ្លែឈើ មួយសន្ទុះស្រាប់តែឃើញបុរសអ្នកបើកPassAPP ដែលចតនៅមុខកន្លែងលក់ផ្លែឈើនោះបើកចេញមកសំដៅស្ត្រីនោះ។ក្រោយពីបើកដេញបុកស្ត្រី ពេញផ្សារលើធំថ្មី រួចមកក៏ឃើញបុរសនោះទាញកាំបិតចិតបន្លែ ចាក់មកលើស្ត្រីនោះចំនួន២កាំបិត ចាក់បុកចំពោះខាងក្រោមដោះផ្នែកខាងស្តាំបណ្តាលឲ្យរបួសធ្ងន់ ត្រូវបានប្អូនស្រីដឹកយកទៅសង្គ្រោះនៅមន្ទីរពេទ្យឯកជនស៊ឹង រិទ្ធី រ៉េត។
សមត្ថកិច្ចបានឲ្យដឹងថា ករណីហិង្សាដោយចេតនានេះ បានកើតឡើងរវាងប្តីប្រពន្ធ កាលពីយប់មិញនៅមុខផ្សារលើធំថ្មី បង្កឡើងដោយប្តីបានយកកូនកាំបិត មកចាក់ប្រពន្ធបណ្តាលឲ្យរបួសធ្ងន់ហើយទុកPassAPP ពាក់ស្លាកលេខសៀមរាប ១.AF.៨៨០៣ នៅកន្លែងកើតហេតុ រួចយកម៉ូតូរបស់ប្រជាការពារភូមិជិះចេញទៅបាត់។ បន្ទាប់ពីជិះម៉ូតូរបស់ប្រជាការពារភូមិ យកទៅទុកនៅផ្ទះរបស់ខ្លួនក្នុងភូមិខា្នរ សង្កាត់ជ្រាវហើយយករថយន្តឡុចស៊ីស RX300 ពណ៌សពាក់ស្លាកលេខសៀមរាប ២.C៧១៧៣ ចេញដោយសុវត្ថិភាព។
ជនបង្កឈ្មោះ តាំង លាប ភេទប្រុសអាយុ៣៧ឆ្នាំមានស្រុកកំណើតនៅខេត្តកំពង់ចាមបច្ចុប្បន្នរស់នៅភូមិខ្នារ សង្កាត់ជ្រាវ ក្រុង/ខេត្តសៀមរាប ចំណែកស្ត្រីជនរងគ្រោះឈ្មោះ លាន ប៊ុនណាត អាយុ៣៥ឆ្នាំរស់នៅភូមិសង្កាត់ជាមួយគ្នា ហើយមានកូនចំនួន២នាក់(ស្រីម្នាក់និងប្រុសម្នាក់ រីឯកូនទាំងនាក់រស់នៅជាស្ត្រីរងគ្រោះដែលបានលែងលះគ្នាជាង១ឆ្នាំហើយ។ ជនបង្កបានព្យាយាមសុំត្រូវរ៉ូវគ្នាជាមួយប្រពន្ធវិញតែភាគីខាងស្រីមិនព្រម ទើបកើតជារឿងទំនាស់រហូតបង្កហិង្សានេះឡើង។
បច្ចុប្បន្នកម្លាំងជំនាញកំពុងសហការគ្នាតាមចាប់ខ្លួនជនបង្កដើម្បីយកមកផ្តន្ទាទោសតាមច្បាប់៕
