ភ្នំពេញ៖ ក្មេងៗឃ្វាលគោបានប្រទះឃើញបុរសម្នាក់ ដេកស្លាប់កណ្តាលវាលស្រែ ដោយក្រុមគ្រួសារអះអាងថា គាត់មានជំងឺលើសឈាម។ ហេតុការណ៍នេះបានកើតឡើង នៅភូមិ ថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង កាលពីរសៀលថ្ងៃទី៥ ខែមេសា ឆ្នាំ២០២១ ។
បើតាមសមត្ថកិច្ចបានឱ្យដឹងថា បុរសដែលស្លាប់ឈ្មោះ ហែម សាវ៉ុន អាយុ៥២ឆ្នាំ រស់នៅភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង។ មុនកើតហេតុគេឃើញបុរសនេះ បានផឹកស្រាស្រវឹងហើយ ក៏បានដើរទៅវាលស្រែខាងក្រោយផ្ទះម្នាក់ឯង ខណៈអ្នកភូមិមិនបានចាប់អារម្មណ៍ទេ។ ក្រោយមកស្រាប់តែមានការភ្ញាក់ផ្អើលពីក្មេងៗ ឃ្វាលគោថា មានមនុស្សដេកស្លាប់កណ្តាលវាលស្រែ។
សមត្ថកិច្ចស្រុក នគរបាលប៉ុស្តិ៍រដ្ឋបាល និងគ្រូពេទ្យក្រោយពីពិនិត្យសពរួច សន្និដ្ឋានថា ពិតជាស្លាប់ដោយសារខ្យល់គរ ដែលផឹកស្រាស្រវឹងខ្លាំង ៕
