ភ្នំពេញ៖ លោក ពេជ្រ ស្រស់ ប្រធានគណបក្សយុវជនកម្ពុជា បានលើកឡើងជាមតិថា បិទខេត្តក៏វាអត់បានផលអីដែរ ព្រោះឥឡូវនេះកូវីដ១៩ បានចរាចរទៅដល់ខេត្តមួយចំនួនហើយ ផ្ទុយទៅវិញគឺមានតែវិធានការស្រាវជ្រាវ រកមុខសញ្ញាក៏ដូចជាបិទតំបន់ដែលមានកូវីដ១៩ ចរាចរនៅតំបន់នោះតែប៉ុណ្ណោះទើបល្អ ។
ផ្ដល់កិច្ចសម្ភាសន៍ជាមួយ សារព័ត៌មាន វាយោ កាលពីម្សិលមិញ មេបក្សយុវជនកម្ពុជា បញ្ជាក់យ៉ាងដូច្នេះថា «បិទខេត្តក៏វាអត់បានផលអីដែរ ឥឡូវនេះដោយសារតែមេរោគ កូវីដ១៩ បានចរាចរទៅដល់ខេត្តមួយចំនួនហើយ មានតែវិធានការស្រាវជ្រាវ រកមុខសញ្ញាក៏ដូចជាបិទតំបន់ ដែលមានកូវីដ១៩ ចរាចរនៅតំបន់នោះ។ អាហ្នឹងគឺយើងថ្លឹងថ្លែង សម្រួលដល់បងប្អូនដទៃទៀត ប្រកបមុខរបរបើសិនយើងបិទខេត្តទាំងអស់ យើងអត់ដឹងថាមេរោគនោះមានវិសាលភាព គ្របដណ្ដប់ទូទាំងខេត្តឬអត់» ។
លោកថ្លែងថា អ្វីដែលគួរធ្វើនៅពេលនេះ គឺបិទការជួបជុំវិញល្អជាង ព្រោះថាការបន្តឱ្យមានការជួបជុំ វាមានហានិភ័យខ្ពស់ក្នុងឆ្លងជំងឺកូវីដ-១៩ ដូច្នេះមានតែការអនុវត្តការដាក់បម្រាមឱ្យបានម៉ឺងម៉ាត់កុំឱ្យមានការជួបជុំប៉ុណ្ណោះ ទើបមិនមានករណីឆ្លងធ្ងន់ធ្ងរ។ ករណីនេះ លោកពេជ្រ ស្រស់ ឃើញប៉ូលីសបានចុះទៅបំបែកការជួបជុំនៅតាមទីសាធារណៈដែរ ការធ្វើបែបនេះ លោកគាំទ្រនិងស្នើឱ្យបិទការជួបជុំតែម្ដង ដើម្បីកុំឱ្យមានករណីឆ្លងតទៅទៀត និងជួយទៅដល់ប្រជាពលរដ្ឋដែលកំពុងប្រកបរបរចិញ្ចឹមជីវិតប្រចាំថ្ងៃ ជាជាងបិទក្រុងទាំងមូល ។
សូមបញ្ជាក់ថា គិតត្រឹមព្រឹកថ្ងៃទី៣០ ខែមីនា ឆ្នាំ២០២១ កម្ពុជាមានអ្នកឆ្លងជំងឺកូវីដ១៩សរុបចំនួន ២៣៧៧នាក់ អ្នកជាសះស្បើយចំនួន ១១៧៦នាក់ អ្នកកំពុងព្យាបាលចំនួន ១១៨៦នាក់ និងអ្នកស្លាប់ចំនួន ១១ នាក់៕
