ភ្នំពេញ៖ លោក ព្រុំ សុខា រដ្ឋមន្ត្រីក្រសួងមុខងារសាធារណៈ បានសម្រេចបង្វែរសំណុំរឿង របស់លោក ខឹម មុនីកុសល ជាមន្ត្រីសុខាភិបាល ដែលត្រូវបានលោកស្រី បាន ស្រីមុំ បណ្ដេញចេញពីក្របខណ្ឌ ទៅឲ្យរដ្ឋបាលខេត្តប៉ៃលិន ដោះស្រាយឡើងវិញ ឲ្យស្របតាមគោលការណ៍ បែបបទ និងនីតិវិធី ដែលមានជាធរមាន។
ក្នុងលិខិត ចុះថ្ងៃទី២៦ ខែមីនា ឆ្នាំ២០២១លោក រដ្ឋមន្ត្រី ព្រុំ សុខា ជម្រាបជូនលោកស្រី បាន ស្រីមុំ អភិបាលខេត្តប៉ៃលិនថា កាលពីថ្ងៃទី២៤ ខែមីនា ឆ្នាំ២០២១ ក្រសួងមុខងារសាធារណៈ បានទទួលពាក្យបណ្តឹងតវ៉ារបស់លោក ខឹម មុនីកុសល អាយុ ៤៨ឆ្នាំ ជាមន្ត្រីសុខាភិបាល នៅការិយាល័យបង្ការ និងគ្រប់គ្រងជំងឺនៃមន្ទីរសុខាភិបាល ខេត្តប៉ៃលិន ដែលបានដាក់ពាក្យប្តឹងជំទាស់ នឹងដីកាលេខ ០១៨/២១ ដក.តត របស់រដ្ឋបាលខេត្តប៉ៃលិន ចុះថ្ងៃទី១៩ ខែមីនា ឆ្នាំ២០២១ ស្តីពី ការអនុវត្តទណ្ឌកម្មខាងវិន័យថ្នាក់ទី២។
លោករដ្ឋមន្ត្រី លើកឡើងថា «អនុលោមមាត្រា ៦៧ ដល់មាត្រា ៧០ នៃព្រះរាជក្រឹត្យ ស្តីពី លក្ខន្តិកៈដោយឡែក សម្រាប់បុគ្គលិករដ្ឋបាលថ្នាក់ក្រោមជាតិ និងលិខិតបទដ្ឋានគតិយុត្តិដទៃទៀត ខ្ញុំសូមបង្វែរពាក្យបណ្តឹងតវ៉ានេះ ទៅរដ្ឋបាលខេត្តប៉ៃលិន ដើម្បីបង្កើតគណៈកម្មាធិការសម្រុះសម្រួលទំនាស់ ពាក់ព័ន្ធនឹងកិច្ចការមុខងារសាធារណៈខេត្តប៉ៃលិន ក្នុងការដោះស្រាយករណីនេះ ឲ្យស្របតាមគោលការណ៍ បែបបទ និងនីតិវិធី ដែលមានជាធរមាន»។
លោករដ្ឋមន្ត្រី ព្រុំ សុខា បានជម្រាបជូនលោកស្រី អភិបាលខេត្តប៉ៃលិន សូមចាត់ចែងអនុវត្ត និងដោះស្រាយឲ្យទទួលបានលទ្ធផលល្អប្រសើរ។
សូមរំលឹកថា កាលពីថ្ងៃទី២៤ ខែមីនា ឆ្នាំ២០២១ លោកគ្រូពេទ្យ ខឹម មុនីកុសល បានឡើងមកតវ៉ា នៅរាជធានីភ្នំពេញ ដោយបានដាក់ពាក្យបណ្តឹង ទៅក្រសួងសុខាភិបាល និងក្រសួងមុខងារសាធារណៈ ដើម្បីជំទាស់នឹងការសម្រេចរបស់អភិបាលខេត្តប៉ៃលិន ដែលបានបណ្តេញរូបលោក ចេញពីក្របខណ្ឌមន្ត្រីរាជការ។
លោក ខឹម មុនីកុសល អាយុ ៤៨ឆ្នាំ ក្រោយបានបញ្ចប់ការសិក្សា នៅប្រទេសអាល្លឺម៉ង់ នៅឆ្នាំ២០១១ គឺនៅឆ្នាំ២០១២ លោកបានផ្ទេភារកិច្ច ពីអនុប្រធានការិយាល័យបច្ចេកទេស ទៅបំរើការ ជាអនុប្រធានមន្ទីរពេទ្យខេត្តប៉ៃលិន។នៅឆ្នាំ២០១៨ លោក ខឹម មុនីកុសល ត្រូវបានប្រធានមន្ទីរសុខាភិបាល ខេត្តប៉ៃលិន សម្រេចផ្ទេរពីអនុប្រធានមន្ទីរពេទ្យបង្អែកខេត្ត ឲ្យទៅបម្រើការងារ នៅការិយាល័យបច្ចេកទេស នៃមន្ទីរសុខាភិបាល ខេត្តប៉ៃលិន។
កាលពីថ្ងៃទី១៩ ខែមីនា ឆ្នាំ២០២១ លោកស្រី បាន ស្រីមុំ អភិបាលខេត្តប៉ៃលិន បានចេញដីកា សម្រេចបណ្តេញលោក ខឹម មុនីកុសល ចេញពីក្របខណ្ឌមន្ត្រីសុខាភិបាលជាន់ខ្ពស់។ មូលហេតុ ត្រូវបានលោកស្រី អភិបាលខេត្ត លើកឡើងថា «លោក ខឹម មុនីកុសល បានប្រព្រឹត្តិកំហុស និងការឆ្គាំឆ្គងក្នុងវិជ្ជាជីវៈ»៕
