ភ្នំពេញ៖ ករណីហិង្សាដែលត្រូវបានបណ្ដាញទំនាក់ទំនងសង្គមបង្ហោះ និងចែករំលែកជាបន្តបន្ទាប់ បច្ចុប្បន្នម្តាយតិរច្ឆាន ដែលប្រើហឹង្សាយ៉ាងព្រៃផ្សៃលើកូនស្រីវ័យ ៧ឆ្នាំត្រូវបានសមត្ថកិច្ចនាំខ្លួនទៅសាកសួរ និងកសាងសំណុំរឿង ដើម្បីចាត់ការតាមនិតិវិធីច្បាប់ហើយ។
កាលពីថ្ងៃទី២០ ខែមីនា ឆ្នាំ ២០២១ ឯកឧត្តម ឧត្តមសេនីយ៍ឯក ជីវ ផល្លី ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន បានបញ្ជាក់ឲ្យដឹងថា បន្ទាប់ពីទទួលបានព័ត៌មាននេះ កម្លាំងជំនាញនៃនាយកដ្ឋាន សហការជាមួយស្នងការដ្ឋាននគរបាលខេត្តពោធិ៍សាត់ បានបើកការស្រាវជ្រាវទទួលបានលទ្ធផលដូចខាងក្រោម៖
-ជាករណីហិង្សាក្នុងគ្រួសារ បង្កឡើងដោយម្តាយបង្កើត ឈ្មោះ វ៉ែន សុធន់ អាយុ២៦ឆ្នាំ ជនជាតិខ្មែរ បានវាយកូនស្រីបណ្តាលឲ្យរងរបួស។
-កើតហេតុនាថ្ងៃទី២០ ខែមីនា ឆ្នាំ២០២១ វេលាម៉ោង៩នឹង៣០នាទីព្រឹក នៅចំណុចផ្ទះមុខសញ្ញា ស្ថិតនៅភូមិកណ្តុរស ឃុំបឹងកន្ទួត ស្រុកក្រគរ ខេត្តពោធិ៍សាត់។
-ជនរងគ្រោះឈ្មោះ ឈឿន ណារី ភេទស្រី អាយុ៧ឆ្នាំ ជនជាតិខ្មែរ ត្រូវជាកូនបង្កើត។
បញ្ជាក់ផងដែរថា នៅថ្ងៃទី២០ ខែមីនា ឆ្នាំ២០២១ វេលាម៉ោងប្រហែល៨:០០នាទីព្រឹក ជនរងគ្រោះ បានយកលុយចំនួន២០០០៛(ពីរពាន់រៀល) ទៅទិញទឹកខ្នុរក្រឡុកចំនួន៤ដប ចែកបងប្អូនផឹក ពេលមកដល់ផ្ទះ ម្តាយជនរងគ្រោះបានសួរនាំកូន ហើយកូនបានឆ្លើយប្រាប់ថា៖មកពីទិញទឹកខ្នុរក្រឡុកចែកបងប្អូនផឹកស្រាប់តែ ម្តាយបានស្ទុះទៅវាយបោចសក់ ទះកំផ្លៀង និងជាន់កទៅលើដី បណ្តាលឲ្យជនរងគ្រោះរងរបួសគ្រាំខាងក្នុងខ្លួន។ មូលហេតុ ដោយសារតែជនរងគ្រោះបានយកលុយទៅចាយអស់២០០០៛ ទើបត្រូវជាម្តាយវាយធ្វើបាបដូច្នេះ។
នៅថ្ងៃទី២១ ខែមីនា ឆ្នាំ២០២១ ដោយមានការសម្របសម្រួលពី ឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ កម្លាំងជំនាញ នៃអធិការដ្ឋាននគរបាលស្រុកក្រគរ បានឃាត់ខ្លួន ឈ្មោះ វ៉ែន សុធន់ ភេទស្រី អាយុ២៦ឆ្នាំ ជនជាតិខ្មែរ ដើម្បីកសាងសំណុំរឿងតាមនីតិវិធី ៕
