ភ្នំពេញ៖ បុរសវ័យជាង ៥០ឆ្នាំម្នាក់ បានរត់គេចខ្លួនចូលក្នុងព្រៃបាត់ស្រមោល ក្រោយពីបានចាក់សម្លាប់កូនប្រសារប្រុស ព្រោះតែរឿងជម្លោះពាក្យសម្ដីបន្តិចបន្តួច ។ ហេតុការណ៍នេះ បានកើតឡើងកាលពីយប់ ថ្ងៃទី២ ខែមីនា ឆ្នាំ២០២១ នៅចំណុចអូរឈើទាល ភូមិកងដីស សង្កាត់ព្រះបាទ ក្រុងស្ទឹងត្រែង ។
ជនរងគ្រោះមានឈ្មោះ ចាន់ឆាយ វណ្ណៈ អាយុ៣៦ឆ្នាំ ។ ចំណែកឪពុកក្មេកជាជនដៃដល់មានឈ្មោះ ឈាន់ ឆឿន អាយុ៥៣ឆ្នាំ រស់នៅភូមិ ឃុំកើតហេតុខាងលើ ។
បើតាមគ្រួសារជនរងគ្រោះ បានប្រាប់សមត្ថកិច្ចថា ជម្លោះដែលបង្កហិង្សារហូតស្លាប់ គឺដោយសារជនរងគ្រោះស្រវឹង ហើយប្រកែកគ្នាជាមួយឪពុកក្មេក រហូតទប់កំហឹងពុំបានស្ទុះទៅវាយដំគ្នា ។ គ្រានោះកូនៗនៅជុំគ្នា៤ទៅ៥នាក់ បានចាប់ឃាត់ និងបំបែកចេញ តែជនរងគ្រោះមិនស្តាប់ទាំងកំរោល ដេញវាយឪពុកក្មេករហូតម្នាក់ប្រដាប់ដោយដំបង ម្នាក់ប្រដាប់ដោយកាំបិតការពារខ្លួន ។ ជម្លោះមួយប្រាវនោះ ភាគីជាឪពុកក្មេកបានស្តាប់កូនៗ តែកូនប្រសាប្រុសនោះមិនបាន ស្តាប់នរណាម្នាក់ឡើយ បើទោះបីបងប្អូនព្យាយាមចាប់ឃាត់ ។ ជនរងគ្រោះបានទាញដំបងដេញវាយឪពុកក្មេកបន្ត ចំណែកឪពុកក្មេកក៏បានទៅយកពន្លៀកជាជ័រ កៅស៊ូ គ្រាជនរងគ្រោះស្ទុះលោតទៅវាយ ឪពុកក្មេករូបនោះក៏បានចាក់ទៅវិញ ពេលប្រតាយប្រតប់ជាច្រើនពន្លៀក ក្នុងយប់ងងឹត ហើយក៏រត់ចូលព្រៃ បន្ទាប់មកជនរងគ្រោះដេកដួលលើដី និងខ្ទប់របួសដោយឃើញហូរឈាមច្រើន ភ្លាមៗនោះបងប្អូនប្រញ៉ាប់បញ្ជូនទៅមន្ទីរពេទ្យ តែត្រូវដាច់ខ្យល់ពេលដល់មន្ទីរពេទ្យ ។
ក្រោយកើតហេតុកម្លាំងនគរបាលប៉ុស្តិ៍រដ្ឋបាល ចុះដល់កន្លែងកើតហេតុទាំងយប់ពិនិត្យទីតាំង និងប្រមូលវត្ថុតាងតាមឃាត់ខ្លួនជនដៃដល់ ។ លុះព្រឹកឡើង កម្លាំងនគរបាលប៉ុស្តិ៍ ក្រុងព្រហ្មទណ្ឌ រួមសហការជាមួយកម្លាំងនគរបាលការិយាល័យ បច្ចេកទេសធ្វើកោសល្យវិច្ច័យ និងគ្រូពេទ្យចុះធ្វើកោសល្យវិច្ច័យ លើសាកសពនៅសាលដាក់សពមន្ទីរពេទ្យបង្អែកខេត្ត ។ ជាក់ស្តែងលើដងខ្លួនសពមានស្នាមមុត ដោយវត្ថុចុងស្រួចច្រើនកន្លែង បណ្តាលអោយហូរឈាមរហូតស្លាប់ ។ បច្ចុប្បន្នសាកសពជនរងគ្រោះ ត្រូវបានប្រគល់ក្រុមគ្រួសារ យកទៅធ្វើបុណ្យតាមប្រពៃណី ។
ចំណែកជនដៃដល់ជាឳក្មេក កម្លាំងសមត្ថកិច្ចកំពុងតែស្រាវជ្រាវ ដើម្បីចាប់ខ្លួនយកមកផ្តន្ទាទោសតាមច្បាប់ ៕
