ភ្នំពេញ៖ បុរសវ័យ៤០ឆ្នាំម្នាក់ ដេកស្លាប់ក្រោមសំយាបផ្ទះប្អូនស្រីជីដូនមួយ របស់ខ្លួនដោយសង្ស័យថាខ្យល់គរ ធ្វើឲ្យមានការភ្ញាក់ផ្អើដល់អ្នកស្រុក និងអាជ្ញាធរចុះដល់កន្លែងកើតហេតុ ។ ករណីនេះកើតឡើងនៅវេលាម៉ោង ៩និង០៥នាទី កាលពីព្រឹកថ្ងៃទី១៥ ខែកុម្ភៈ ឆ្នាំ២០២១ ស្ថិតក្នុងភូមិអូរបាក់ត្រា ឃុំព្រងិល ស្រុកភ្នំក្រវាញ ខេត្តពោធិ៍សាត់ ។
សមត្ថកិច្ចនគរបាលរដ្ឋបាល និងលោកមេឃុំព្រងិលបានឲ្យដឹងថា ក្រោយពីសមត្ថកិច្ចបានទទួលព័ត៌មានពីប្រជាពលរដ្ឋថា មានមនុស្សដេកស្លាប់ ក្រោមសំយាបផ្ទះដោយសង្ស័យ (ខ្យល់គរ) នៅចំណុចភូមិអូរបាក់ត្រា ឃុំព្រងិល ស្រុកភ្នំក្រវាញ ខេត្តពោធិសាត់ និង មានការសម្របសម្រួលពី លោកព្រះរាជអាជ្ញាអមសាលាដំបូងខេត្ត សមត្ថកិច្ចបានចុះដល់កន្លែងកើតហេតុធ្វើការពិនិត្យ យ៉ាងយកចិត្តទុកដាក់ហើយសន្និដ្ឋានថា ជនរងគ្រោះឈ្មោះ ម៉ន វិប ភេទប្រុស អាយុ៤០ឆ្នាំ រស់នៅភូមិអូរស្រាវ ឃុំព្រងិលស្រុកភ្នំក្រវាញខេត្តពោធិ៍សាត់ បានដេកស្លាប់នៅលើគ្រែក្រោមសំយាបផ្ទះ របស់ប្អូនស្រីជីដូនមួយរបស់ខ្លួន ឈ្មោះ អ៊ី រ៉ាន់ អាយុ៣២ឆ្នាំ រស់នៅភូមិឃុំកើតហេតុខាងលើ ។
ការចុះពិនិត្យនេះ នគរបាលមូលដ្ឋានបានសហការ ជាមួយសមត្ថកិច្ចជំនាញបច្ចេកទេស វិទ្យាសាស្ត្រខេត្ត កម្លាំងជំនាញព្រហ្មទណ្ឌកំរិតធ្ងន់ខេត្ត បានចុះទៅធ្វើការពិនិត្យសាកសព នៅកន្លែងកើតហេតុ រួចសន្និដ្ឋានបានថា ករណីដេកស្លាប់របស់ជនរងគ្រោះឈ្មោះម៉ន វិប គឺ ពិតជាករណីស្លាប់ ដោយខ្យល់គរពិតប្រាកដមែន។
ក្រោយពីសមត្ថកិច្ចបានធ្វើការពិនិត្យ ដឹងពីមូលហេតុនៃការស្លាប់ របស់ជនរងគ្រោះ រួចមក សមត្ថកិច្ចបានធ្វើកំណត់ហេតុប្រគល់ សាកសពជូនក្រុមគ្រួសារយកទៅ ធ្វើបុណ្យតាមប្រពៃណី ៕
