ភ្នំពេញ៖ កម្លាំងនគរបាលទទួលផ្នែក ការងារព្រហ្មទណ្ឌខណ្ឌពោធិ៍សែនជ័យ សហការជាមួយកម្លាំងនគរបាល ប៉ុស្តិ៍រដ្ឋបាលសង្កាត់ចោមចៅ២ បានបង្ក្រាបឃាត់ខ្លួនក្រុមក្មេងទំនើងចំនួន ២៨នាក់ ជិះម៉ូតូអូសដាវសាំម៉ូរ៉ៃតាមដងផ្លូវទាំងយប់អធ្រាត្រ បង្កឲ្យប្រជាពលរដ្ឋភ័យខ្លាច និងបានដកហូតគ្រឿងញៀន ៧កញ្ចប់ថែមទៀត ។
កម្លាំងអធិការដ្ឋាននគរបាលខណ្ឌពោធិ៍សែនជ័យ ឱ្យដឹងថា កាលពីវេលាម៉ោង ១និង៣០នាទី ឈានចូលថ្ងៃទី៤ ខែកុម្ភៈ ឆ្នាំ២០២១ នៅចំណុចផ្លូវវេងស្រេង ក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានក្មេងទំនើង ១ក្រុមជិះម៉ូតូចំនួន១២គ្រឿង ដេញប្រណាំងគ្នាប្រសាចតាមផ្លូវ ហើយអូសដាវសាំម៉ូរ៉ៃពេញថ្នល់ ខណៈនោះក៏បានជួបប្រទះជាមួយ កម្លាំងនគរបាលខណ្ឌពោធិ៍សែនជ័យ កំពុងចេញល្បាត ដោយឃើញសកម្មភាពបែបនោះកម្លាំង នគរបាលក៏បានចាប់ឃាត់ក្មេងទំនើងទាំងនោះ ឆែកឆេរត្រួតពិនិត្យរកឃើញថ្នាំញៀន ៧កញ្ចប់ រួមនឹងអាវុធជាប្រភេទកាំបិទកែច្នៃ ដាវសាំម៉ូរ៉ៃ និងជំពាមកៅស៊ូ សរុប០៦ និងដុំថ្ម០៧គ្រាប់ ដែកថ្នាំង០១ដើម និងម៉ូតូ១២គ្រឿង ។
សមត្ថកិច្ចបន្តថា ក្នុងចំណោមក្មេងទំនើងទាំង ២៨នាក់នោះ មានមុខសញ្ញាមួយចំនួនដែលសង្ស័យ ធ្លាប់ធ្វើសកម្មភាពធាក់ផ្តួលម៉ូតូប្រជាពលរដ្ឋ ដើម្បីប្លន់យកម៉ូតូ និងមានមុខសញ្ញាឆក់ផងដែរ ។ ក្មេងទំនើងទាំងនេះបច្ចុប្បន្នបាននឹងឃាត់ខ្លួនសាកសួរ នៅអធិការដ្ឋាននគរបាលខណ្ឌពោធិ៍សែនជ័យ ។ ចំពោះក្មេងទំនើងរកឃើញថា ជាប់ពាក់ព័ន្ធជាមុខសញ្ញាប្រព្រឹត្តបទល្មើសខុសច្បាប់ ត្រូវបញ្ជូនទៅចាត់ការតាមផ្លូវច្បាប់ ។ ចំណែកមួយចំនួនទៀតមិនធ្លាប់ជាប់ ពាក់ព័ន្ធនឹងការប្រព្រឹត្តបទល្មើស ត្រូវអប់រំធ្វើកិច្ចសន្យាកោះហៅ អាណាព្យាបាលមកទទួល និងអនុញ្ញាតត្រឡប់ទៅផ្ទះអប់រំបន្ត ។
សូមបញ្ជាក់ថា ជុំវិញបញ្ហាក្មេងទំនើងនេះ ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញថ្មីៗនេះ បានលើកឡើង និងដាក់បទបញ្ជាម៉ឺងម៉ាត់ដល់កម្លាំងនគរបាលទាំង១៤ខណ្ឌ និងកម្លាំងការិយាល័យជំនាញ ត្រូវតែចាត់វិធានការឱ្យមានប្រសិទ្ធភាព បង្ការ ទប់ស្កាត់ និងបង្ក្រាបក្រុមក្មេងទំនើងដែល បង្កឱ្យប៉ះពាល់អសន្តិសុខសង្គម ។ ជាងនេះថែមទៀត ការបង្ក្រាបក្មេងទំនើងមិនត្រូវយោគយល់នោះឡើយ ទោះកូនអ្នមាន ឬអ្នកធំក៏ដោយ ៕
