ភ្នំពេញ៖ នារីជាអតីតនិស្សិតពេទ្យឆ្មប ដែលជាប់អាហារូបករណ៍រៀននៅប្រទេសថៃម្នាក់ ខំរៀនរហូតដល់ មានជំងឺសរសៃប្រសាទ ហើយរត់គេចខ្លួនចេញពីផ្ទះបាត់ជាង ២ខែ ស្រាប់តែប្រទះឃើញចងកសម្លាប់ខ្លួន នៅលើដើមពុទ្រា ក្នុងដីឡូតិ៍មួយកន្លែង ។ ហេតុការណ៍នេះបានបង្កការភ្ញាក់ផ្អើលកាលពីម៉ោង ៦៖៣០ព្រឹក ថ្ងៃទី១១ ខែមករា ឆ្នាំ២០២១ នៅចំណុចដីឡូតិ៍ មួយកន្លែងតាមផ្លូវកែវចិន្តា ក្រុម១២ ស្ថិតក្នុងភូមិ០១ សង្កាត់ជ្រោយចងា្វរ ខណ្ឌជ្រោយចង្វារ ។
នារីរងគ្រោះមានឈ្មោះ ឈីវ សំអុន អាយុ៣១ឆ្នាំ មានលំនៅនៅផ្ទះលេខ១៤៦D ផ្លូវលំ ក្នុងភូមិ០២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
នគរបាលបានឱ្យដឹងបន្តថា នារីរូបនោះបានបញ្ចប់ជីវិតខ្លួនឯង ដោយយកខ្សែនីឡុងចងភ្ជាប់ ទៅនឹងដើមពុទ្រាក្នុងព្រៃ ហើយត្រូវបានក្មេងៗក្នុងភូមិទៅបេះផ្លែពុទ្រា ក៏ប្រទះឃើញរត់ទៅប្រាប់ឪពុកម្តាយ រួចក៏រាយការណ៍ប្រាប់នគរបាលមូលដ្ឋាន ហើយក្រោយមកស្គាល់ ក៏បានប្រាប់បងប្អូននារីរងគ្រោះរូបនេះតែម្តង ។
តាមបងស្រីនារីរងគ្រោះរូបនេះ បានប្រាប់សមត្ថកិច្ចថា ប្អូនស្រីខ្លួន (នារីរងគ្រោះ) មានជំងឺសរសៃប្រសាទប្រមាណជិត ១០ឆ្នាំមកហើយ។ ហើយរយៈពេលប្រមាណជិត ២ខែក្រោយនេះ នាងក៏បានរត់ចេញពីផ្ទះទៅបាត់ខ្លួន មិនដឹងថា ទៅទីណានោះទេ ក៏ស្រាប់តែទទួលបានដំណឹងពីសមត្ថកិច្ចថា នាងបញ្ចប់ជីវិតខ្លួនឯងតែម្តង។
កន្លងមកនារីរងគ្រោះរូបនោះជានិស្សិតពេទ្យ ដែលរៀនពូកែ ប្រឡងជាប់អាហារូបករណ៍ទៅរៀននៅប្រទេសថៃ រហូតដល់ជិតចប់ទៅហើយ ប៉ុន្តែដោយសារតែការខិតខំរៀនខ្លាំងពេក បណ្តាលឱ្យនាងរលាកខួរក្បាល ក៏មានជំងឺសរសៃប្រសាទ ហើយត្រូវបានសាលាទាក់ទងមកក្រុមគ្រួសារ ឱ្យទៅទទួលយកមកស្រុកកំណើតវិញ និងបានបញ្ចប់ជីវីតខ្លួនឯងនៅពេលនេះតេម្តង ។
ក្រោយពេលកើតហេតុ សពនារីរងគ្រោះត្រូវបានក្រុមគ្រួសារ បញ្ជូនទៅកាន់ឈាបនដ្ឋាន វត្តពោធិ៍យារាម ហៅវត្តចាស់ ដើម្បីធ្វើបុណ្យតាមប្រពៃណី ៕
