ភ្នំពេញ៖ ជនជាប់ចោទឈ្មោះ គឹម រតនា ភេទប្រុស អាយុ ៣១ឆ្នាំ ដែលជាប់ពីបទ ជួញដូរសារធាតុញៀនដោយខុសច្បាប់ បានរត់គេចចេញពីពន្ធនាគារខេត្តមណ្ឌលគិរី កាលពីម៉ោង ៩៖៣០នាទីព្រឹក ថ្ងៃទី៧ ខែមករា ឆ្នាំ២០២១ ។
ក្រោយពីមានសំណូមពរ ពីប្រធានពន្ធនាគារខេត្តមណ្ឌលគិរី កម្លាំងសមត្ថកិច្ចក្រុងសែនមនោរម្យ និងកម្លាំងស្នងការដ្ឋាននគរបាលខេត្តមណ្ឌលគិរី ដឹកនាំបញ្ជាផ្ទាល់ដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត បានធ្វើចាប់ឃាត់ខ្លួនបានជនល្មើសវិញ នៅវេលាម៉ោង ១០ព្រឹកថ្ងៃខែឆ្នាំដដែល ។
ករណីនេះលោកឧត្តមសេនីយ៍ទោ ឡោ សុខា និងលោក ម៉ម វណ្ណដា ព្រះរាជអាជ្ញារងអមសាលាដំបូងខេត្តមណ្ឌលគិរី បានប្រគល់ខ្លួនជនជាប់ចោទទៅឲ្យ ការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត ដើម្បីកសាងសំណុំរឿង បញ្ជូនអនុវត្តបន្តតាមនីតិវិធី ៕
