ភ្នំពេញ៖ កាលពីវេលាម៉ោង ១៖៣០នាទីយប់ថ្ងៃទី៤ ខែមករា ឆ្នាំ២០២១ មានករណីឆេះទូកមួយគ្រឿង យ៉ាងសន្ធោរសន្ធៅ ស្ថិតនៅចំនុចប្រហែល ៣០០ម៉ែត្រពីផែយាយត្រីជី ក្នុងភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ ។
នគរបាលបានឲ្យដឹងថា ទូកកន្ទុយវែងចំនួន ១គ្រឿងដែលឆេះនេះមានប្រវែងទទឹង ៣ម៉ែត្រ បណ្តោយ១៨ម៉ែត្រ ម៉ាស៊ីន១៥០សេស ពណ៌លឿង ម្ចាស់ឈ្មោះ គង់ ធី ភេទប្រុស អាយុ៣៩ឆ្នាំ ទីលំនៅបច្ចុប្បន្នភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ។
បើតាមសម្ដីតៃកុងទូកឈ្មោះ ហេន ម៉េងហុង ភេទប្រុស និងកូនដៃទូក ឈ្មោះ ហេន ម៉េងហៃ ភេទប្រុស បានអោយដឹងថា ពួកគាត់ទាំង ២នាក់ បានដឹកអង្ករយកទៅអោយទូកអូស ដែលចតរង់ចាំនៅមុខច្រកចូលឆ្នេរកោះរ៉ុងសន្លឹម (សារ៉ាសិនបេ) លុះដល់កន្លែងកើតហេតុ ក៏មានភ្លើងឆេះចេញពីឃ្លុបម៉ាស៊ីន ទើបណ្តាលអោយឆាបឆេះសាំងលើទូកចំនួន ២កាន និងប្រេងម៉ាស៊ូតចំនួន ៣កាន និងកំប៉ុងហ្គាសប្រហែលចំនួន ១០កំប៉ុង ហើយក៏បានឆេះបណ្ដាលឲលិចតែម្តងទៅ ។
បើតាមសមត្ថកិច្ចបានអោយដឹងថា ការខូចខាតទូកទំហំ ៣ម៉ែត្រ x ១៨ម៉ែត្រ និងសាំងលើទូកចំនួន ២កាន និងម៉ាស៊ូតចំនួន ៣កាន និងកំប៉ុងហ្គាសប្រហែលចំនួន ១០កំប៉ុង ទាំងស្រុង ចំណែកឯមនុស្សមិនបង្កគ្រោះថ្នាក់ដល់ជីវិតនោះទេ គ្រាន់តែរងរបួសស្រាលៗប៉ុណ្ណោះ ៕
