ភ្នំពេញ៖ នគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាល ខេត្តកណ្តាល សហការជាមួយនគរបាលខេត្តស្វាយរៀង កាលពីរសៀលថ្ងៃទី១៩ ខែធ្នូ ឆ្នាំ២០២០ បានចាប់ខ្លួនប្អូនប្រុស ដែលបាញ់បងប្រុសបង្កើត បណ្តាលអោយរងរបួសធ្ងន់ធ្ងរ បានហើយ ។
បើតាមសមត្ថកិច្ច បានអោយដឹងថា នៅថ្ងៃទី២០ ខែធ្នូ ឆ្នាំ២០២០ សមត្ថកិច្ចកំពុងនាំខ្លួនជនសង្ស័យ មកស្នងការដ្ឋាននគរបាលខេត្តកណ្តាល ដើម្បីបន្តនីតិវិធី តាមច្បាប់ ។ ការបាញ់នេះ បានកើតឡើងកាលពីវេលាម៉ោងជាង៧ព្រឹក ថ្ងៃទី១៩ ខែធ្នូ ឆ្នាំ២០២០ នេះ នៅចំណុចផ្ទះជនសង្ស័យ ភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ។
លោកវរសនីយ៍ឯក ឡាក់ ម៉េងធី នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្តាល បានអោយដឹងថា ជនរងគ្រោះ ឈ្មោះ ឆាយ សៀមមី អាយុ៤៣ឆ្នាំ មុខរបរជាងភ្លើង មានទីលំនៅភូមិកាហេ ឃុំកាហេ ស្រុកកងមាស ខេត្តកំពង់ចាម ។
ចំណែក ជនសង្ស័យជាប្អូនបង្កើតមានឈ្មោះ ឆាយ សាលាភ អាយុ៣៦ឆ្នាំ មានទីលំនៅក្នុងភូមិសង្កាត់កើតហេតុមុខរបរ មិនពិតប្រាកដ ដោយជិះម៉ូតូ១គ្រឿងម៉ាក Scoopy ពណ៌ក្រហម ។
លោក ឡាក់ ម៉េងធី បន្តថា មុនពេលកើតហេតុ ជនសង្ស័យជាមនុស្សប្រើប្រាស់គ្រឿងញៀន ហើយតែងតែឈ្មោះគ្នា ជាមួយប្រពន្ធ ដោយប្រពន្ធ ជាអ្នករកស៊ីលក់ផលិតផលតាមអនឡាញ ។ លុះមកដល់ថ្ងៃទី១៨ ខែធ្នូ ឆ្នាំ២០២០ វេលាម៉ោង៤រសៀល ជនសង្ស័យបានឈ្លោះប្រកែក ជាមួយប្រពន្ធរបស់ខ្លួន ពេលនោះ ជនរងគ្រោះបានចូល ទៅជួយសម្របសម្រួល ឲ្យឈប់ឈ្លោះគ្នា តែពេលនោះជនសង្ស័យបែរជាខឹងថា ជនរងគ្រោះចេះដឹងរឿងប្តីប្រពន្ធ របស់គាត់ចង់បំបែកបាក់ ប្តីប្រពន្ធគាត់ ។
លុះមកដល់វេលាម៉ោង៤ទៀបភ្លឺ ថ្ងៃទី១៩ ខែធ្នូ ឆ្នាំ២០២០ ជនសង្ស័យបានទូរស័ព្ទ ហៅជនរងគ្រោះ ពីខេត្តកំពង់ចាម ឲ្យឡើងមកជួបនៅផ្ទះ របស់ខ្លួននៅភូមិព្រែកខ្សេវ សង្កាត់រកាខ្ពស់ ក្រុងតាខ្មៅ ខេត្តកណ្តាល ដើម្បីនិយាយគ្នាបន្តិច ។
ពេលនោះជនរងគ្រោះក៏បានជិះម៉ូតូឡើង មកជួបជនសង្ស័យតាមការណាត់ តែនៅពេលមកដល់មិនទាន់បាននិយាយអ្វីផង ក៏ត្រូវជនសង្ស័យ ដកកាំភ្លើងខ្លីម៉ាកឡុក បាញ់ជនរងគ្រោះ ត្រូវចំក្រោមក្លៀកខាងស្តាំ ធ្លាយគ្រាប់ទៅក្រោយ មានរបួសស្នាមយ៉ាងធ្ងន់ធ្ងរ ហើយជនសង្ស័យបាន រកបាញ់ ឪពុកក្មេក តែមិនផ្ទុះ និង ប្រតាយប្រតប់គ្នា ជ្រុះកាំភ្លើងត្រូវឪពុកក្មេក យកបាន ហើយជនសង្ស័យបាន គេចរួចឡើងជិះម៉ូតូ Scoopy ពណ៌ក្រហម ស្លាកលេខភ្នំពេញ-9941 ជិះឡើងទៅតាខ្មៅ គេចខ្លួនសំដៅ មកភ្នំពេញ ៕
