ភ្នំពេញ៖ លោក ពេជ្រ ស្រស់ ប្រធានគណបក្សយុវជនកម្ពុជា នៅថ្ងៃទី១៣ ខែតុលា ឆ្នាំ២០២០នេះ បានប្រាប់ទៅកាន់ជនមួយចំនួន កុំឆ្លៀតឱកាស ប្រមូលថវិកាវិភាគទាន ដោយភ្ជាប់ឈ្មោះរបស់លោក។
ការលើកឡើងរបស់លោក ពេជ្រ ស្រស់ បែបនេះធ្វើឡើងក្រោយពីមាន អាខោនហ្វេសប៊ុកមួយ ឈ្មោះ “រាជបុត្រា ស្បង”ដោយបានបង្ហោះនូវ ខ្លឹមសារទាំងស្រុងថា «ខ្ញុំបាទសុខទ្រីចង់សុំដល់បងៗមិត្ត ដែលមានចិត្តធម៍សុំជួយឧបត្ថមថវិការ១០០០៛ ១០០០០៛២០០០០៛ ក្ដីតាមកម្លាំងសន្ធារបស់បងៗពូមីង មិត្តិភក្ដិទាំងអស់ ដើម្បីទិញស្បៀងជាគ្រឿងបរិភោគជួយដល់គ្រួសារ ដែលបានជួបនៅគ្រោះទឹកជំនន់នៅតាមខេត្តមួយចំនួន ដោយដឹកនាំដោយលោកពូ ពេជ្រ ស្រស់។បើមានលោកពូ អ្នកមីង បងៗ ចែៗមិត្តភក្ដិណាចង់ចូលរួមអាចឧបត្ថមថវិកាតាមខ្ញុំក៏បានឬតាមផេកលោកពូ ពេជ្រ ស្រស់ក៏បាន។ តាមរយៈលេខទូរស័ព្ទ លោកពូ ពេជ្រ ស្រស់ 070 757 777/លេខទូរស័ព្ទខ្ញុំបាទផ្ទាល់ 095891053៕ខ្ញុំបាទសង្ឈឹមថាបងៗនិងជួយឧបត្ថម។ខ្ញុំបាទសុខទ្រីសូមអរគុណនិងអរព្រះគុណ»។
ជុំវិញករណីនេះលោក ពេជ្រ ស្រស់ បានសរសេរនៅលើបណ្ដាញ សង្គមហ្វេសប៊ុករបស់លោកថា «សូមប្អូនកុំឆ្លៀតឱកាសប្រមូលថវិកាវិភាគទាន ដោយភ្ជាប់ឈ្មោះបងអី បងមិនបានតែងតាំង នរណាឲ្យរ៉ៃអង្គាសក្រៅពីក្រុមការងាររបស់ បងនោះទេ »។
លោក ពេជ្រ ស្រស់ បានបញ្ជាក់ថា «ដូច្នេះខ្ញុំសូមបញ្ជាក់ដល់បងប្អូនជន រួមជាតិឲ្យបានជ្រាបថា៖ ការទទួលវិភាគទាន គឺមានរូបខ្ញុំផ្ទាល់ និងលោក ផន ផល្លា ប្រធាន មូលនិធិក្នុងបក្សខ្ញុំតែប៉ុណ្ណោះ ក្រៅពីនេះគឺមិន មែនជាក្រុមការងារខ្ញុំនោះទេ»៕
