ឃាត់ខ្លួនស្រ្តីម្នាក់ ពាក់ព័ន្ធករណីឆបោកលុយ ពីប្រជាពលរដ្ឋ៦នាក់

ភ្នំពេញ៖ នាយកដ្ឋានប្រឆាំងបទល្មើស បច្ចេកវិទ្យា ក្រោមការចង្អុលបង្ហាញពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ កម្លាំងនាយកដ្ឋាន ប្រឆាំងបទល្មើសបច្ចេកវិទ្យា ក្រោមការដឹកនាំបញ្ជាផ្ទាល់ពី លោកឧត្តមសេនីយ៍ឯក ជា ពៅ ប្រធាននាយកដ្ឋាន បានសហការជាមួយ ព្រះរាជអាជ្ញានៃអយ្យការ អមសាលាដំបូងរាជធានីភ្នំពេញ និងស្នងការដ្ឋាននគរបាលរាជធានីភ្នំពេញ នៅថ្ងៃទី១២ ខែតុលា ឆ្នាំ២០២០ បានស្រាវជ្រាវ បង្ក្រាប ករណីឆបោកប្រាក់ ពីប្រជាពលរដ្ឋ ចំនួន០៦នាក់ (នៅខេត្តខេត្តបាត់ដំបង ២នាក់ ខេត្តមណ្ឌលគីរី ១នាក់ ខេត្តព្រះសីហនុ ១នាក់ ខេត្តស្ទឹងត្រែង ១នាក់ និងខេត្តព្រៃវែង ១នាក់) តាមបណ្តាញសង្គមហ្វេសប៊ុក។

ជនសង្ស័យដែលត្រូវបានឃាត់ខ្លួន ឈ្មោះ ស.រ.ត ហៅស្រីកា ភេទស្រី អាយុ៣០ឆ្នាំ ជនជាតិខ្មែរ មានទីលំនៅ ភូមិអូរបែកក្អម សង្កាត់អូរបែកក្អម ខណ្ឌសែនសុខ រាជធានីភ្នំពេញ។ តាមការសាកសួរចម្លើយ របស់មន្ត្រីជំនាញ ជនសង្ស័យ បានប្រើឧបាយកល ក្នុងការធ្វើសម្មភាពបោកប្រាស់ ដោយប្រើលេខទូរសព្ទជាច្រើនខ្សែ ទំព័រហ្វេសប៊ុកចំនួន១ ឈ្មោះ C Ka Online និងគណនីហ្វេសប៊ុក ចំនួន០៤គឺ យាយម៉ាប់ កាហ្វេ, ល្មៀតខ្មែរសុទ្ធ, Vyna Kamab, Oun Pich ដែលបានធ្វើការផ្សព្វផ្សាយ និងឃោសនា អូសទាញ ឆបោកប្រជាពលរដ្ឋថាជា ឡេខាត់ស្បែក ស្កាប់ពន្លៃ ស្កាប់បៃតង ស្រ្កាប់កាហ្វេទឹកឃ្មុំ ជាផលិតផលធម្មជាតិ ។

បច្ចុប្បន្ន ជនសង្ស័យកំពុងបញ្ជូន ទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់។ នាយកដ្ឋានប្រឆាំងបទល្មើស បច្ចេកវិទ្យា អំពាវនាវដល់ប្រជាពលរដ្ឋ ដែលកំពុងប្រើប្រាស់បណ្តាញសង្គមបច្ចេកវិទ្យា សូមប្រើប្រាស់ ដោយស្មារតី ប្រុងប្រយ័ត្នខ្ពស់ កុំឱ្យធ្លាក់ចូលក្នុងឧបាយកល ជនបោកប្រាស់ ដែលបច្ចុប្បន្ននេះពួកជនឆ្លៀត ឱកាសទាំងនោះកំពុង តែយកប្រព័ន្ធសង្គមបច្ចេកវិទ្យានេះ ទៅធ្វើជាមធ្យោបាយប្រព្រឹត្តិអំពើទុច្ចរិត ៕