ភ្នំពេញ៖ បុរសជាមេអាប៉ោងម្នាក់ បានបាត់បង់ជីវិតដោយសារគាំងបេះដូង ខណៈរត់គេចខ្លួន ពីកម្លាំងសមត្ថកិច្ចចុះបង្ក្រាបបទល្មើស លេងល្បែងស៊ីសងខុសច្បាប់ ។
ជនរងគ្រោះមានឈ្មោះ នៅ ដារ៉ា អាយុ៥៨ឆ្នាំ មានទីលំនៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។
កាលពីវេលាម៉ោង ៣៖៣០នាទីរសៀល ថ្ងៃទី៥ ខែតុលា កម្លាំងនគរបាលប៉ុស្តិ៍រដ្ឋបាលកូប សហការណ៍ជាមួយកម្លាំងប្រជាការពារឃុំ បានចុះទៅបង្ក្រាបបទល្មើស ល្បែងស៊ីសងខុសច្បាប់ (អាប៉ោង) មួយករណីនៅចំណុចវាលត្រពាំងច្រាំង ស្ថិតនៅខាងលិចភូមិផ្គាំចម្ងាយប្រហែល ៥០០ម៉ែត្រ ឃុំសិង្ហ ស្រុកអូរជ្រៅ ខេត្តបន្ទាយមានជ័យ។ ពេលសមត្ថកិច្ចចុះបង្ក្រាប ក្រុមអ្នកលេង និងមេអាប៉ោងបាននាំគ្នារត់គេចខ្លួន ចុះទឹកប្រហែល ៥០ម៉ែត្រ ស្រាប់តែពេលនោះឈ្មោះ នៅ ដារ៉ា ដែលមានជំងឺបេះដូង ជាអ្នកកាន់មេអាប៉ោង រត់រហូតគាំងបេះដូងដួលសន្លប់នៅលើភ្លឺស្រែ។
ឃើញដូច្នោះកម្លាំងសមត្ថកិច្ច នគរបាលបានជួយសង្គ្រោះ និងសែងជនរងគ្រោះទៅកាន់ មណ្ឌលសុខភាពសឹង្ហ នៅវេលាម៉ោង៤ រសៀលថ្ងៃដដែលនោះលោកវេជ្ជបណ្ឌិត នៃមណ្ឌលសុខភាពបានធ្វើការពិនិត្យ ហើយប្រាប់វិញភ្លាមថា ជនរងគ្រោះបានបាត់បង់ជីវិតទៅហើយ។ ករណីខាងលើនេះជនរងគ្រោះ ទំនងភ័យខ្លាចសមត្ថកិច្ចចាប់ខ្លួន ក៏រត់រហូតគាំងបេះដូងដួលសន្លប់ និងបណ្តាលឲ្យបាត់បង់ជីវិត។
បើតាមសមត្ថកិច្ចអះអាងថា អ្នកលេងល្បែងស៊ីសងដូចនេះ (អាប៉ោង) គ្រាន់តែឃាត់ខ្លួនដើម្បីធ្វើការអប់រំតែប៉ុណ្ណោះ មិនមានគោលការណ៍ចាប់ដាក់គុកនោះទេ ប៉ុន្តែដោយអ្នកលេងល្បែងនោះ គាត់ភ័យពេក រត់រហូតគាំងបេះដូងដួលស្លាប់។ បន្ទាប់មកសមត្ថកិច្ចបាន ប្រគល់សាកសពឲ្យក្រុមគ្រួសារ ដើម្បីធ្វើបុណ្យតាមប្រពៃណី៕
