កីឡា៖ តារាបាល់ទាត់អង់គ្លេស លោក Jadon Sancho បានបង្ហាញសារ «យុត្តិធម៌ត្រូវតែមានសម្រាប់ George Floyd» សារនេះលោកបានបង្ហាញក្រោយពេលដែលរកគ្រាប់បាល់បានជូនក្រុម Dortmund ក្នុងការប្រកួតយប់មិញ ។
សកម្មភាពនេះត្រូវបានគេកត់ទុកថាគាត់បានចូលរួមប្រឆាំងតវ៉ា ដែលកំពុងកើនឡើងជុំវិញពិភពលោក ពាក់ព័ន្ធករណីបុរសអតីតប៉ូលិសស្បែកសអាម៉េរិក ដែលបានធ្វើឲ្យជនសង្ស័យស្បែកខ្មៅស្លាប់ ។
សារតវ៉ានេះដែរ កីឡាករ Jadon Sancho ក៏ទទួលបានកាតលឿង ក្រោយដោះអាវក្រុមចេញ បង្ហាញអាវពណ៌លឿងខាងក្នុងជាមួយសារ «យុត្តិធម៌សម្រាប់លោក George Floyd » អំឡុងប្រកួតជាមួយក្រុម Paderborn នាយប់ថ្ងៃអាទិត្យម្សិលមិញ។
ខ្សែបម្រើស្លាបរបស់ក្រុម Dortmund ខាងលើបានរកគ្រាប់បាល់ហ៊ែកទ្រីកជូនក្រុម ដោយក្នុងចំណោមបីគ្រាប់នេះដែរ គាត់បានដោះអាវចេញនៅគ្រាប់ទី១ ដើម្បីគាំទ្រ ដល់ចលនា ‘Black Lives Matter’ ភ្លាមៗ អាជ្ញាកណ្តាល Daniel Siebert ក៏បានផ្តល់កាតលឿងមួយ ។ ថ្វីបើបានស៊ុតពីរគ្រាប់ជូនក្រុមបន្ថែមទៀត ប៉ុន្តែតារាបាល់ទាត់អាយុ ២០ឆ្នាំនេះ មិនសម្រេចចិត្តបង្ហាញសារម្តងទៀតឡើយ ក៏ព្រោះតែខ្លាចទទួលបានកាតលឿងជាលើកទី២ ស្មើកាតក្រហម។
ក្រោយការប្រកួត Sancho បានបង្ហាញសារនៅលើ Instagram ថា យើងមិនគួរភ័យខ្លាចក្នុងការនិយាយអ្វីដែលត្រូវនោះទេ យើងត្រូវរួមគ្នាជាក្រុមតែមួយ និង តស៊ូដើម្បីយុត្តិធម៌ ។ ក្នុងនោះដែរ អតីតខ្សែប្រយុទ្ធអង់គ្លេស Gary Lineker ក៏បានធ្វើការគាំទ្រទៅលើ មតិរបស់ Jadon Sancho ថា sanchooo10 ពិតជាមានទេពកោសល្យអស្ចារ្យ ដែលរកគ្រាប់បាល់ជូន ក្រុម bvb09 នឹងផ្ញើសារចែករំលែកទៀតផង ។
សារតវ៉ារបស់ Sancho បានកើតឡើងប៉ុន្មានម៉ោងប៉ុណ្ណោះ បន្ទាប់ពី ខ្សែប្រយុទ្ធ Marcus Thuram របស់ Borussia Monchengladbach ដែលបានលត់ជង្គង់គាំទ្រដល់ចលនា ប្រឆាំងតវ៉ានេះ បន្ទាប់ពីរកគ្រាប់បាល់បាន អំឡុងប្រកួតជាមួយ Union Berlin ។
ខ្សែប្រយុទ្ធអាយុ ២២ឆ្នាំនេះ ជាអតីតកូនប្រុសជម្រើសជាតិបារាំង និងជាម្ចាស់ពានរង្វាន់ពានពិភពលោក Lillian Thuram ដែលធ្លាប់ជាសកម្មជនប្រឆាំងនឹងការរើសអើងជាតិសាសន៍ចាប់តាំងពីគាត់លេងនៅ Monaco, Parma, Juventus និង Barcelona ។
