របាយការណ៍បានបង្ហាញថា Arsenal បានដាក់សំណើជាផ្លូវការសម្រាប់ខ្សែប្រយុទ្ធឆ្នើម ដោយស្នើឱ្យបង់ប្រាក់ដំបូងចំនួន ៦៥លានអឺរ៉ូ បូកបន្ថែម ១៥លានអឺរ៉ូ ជាប្រាក់លើកទឹកចិត្តផ្អែកលើទម្រង់លេង។ ទោះជាយ៉ាងណាក៏ដោយ កញ្ចប់នោះមិនគ្រប់គ្រាន់ដើម្បីទាក់ទាញប្រធានក្លឹប Sporting ដែលកំពុងទាមទារថ្លៃផ្ទេរខ្ពស់ជាងនេះ។
លោក Varandas បានបញ្ជាក់យ៉ាងច្បាស់ថាកិច្ចព្រមព្រៀងណាមួយសម្រាប់ការផ្ទេរ Gyokeres ត្រូវតែចាប់ផ្តើមក្នុងតម្លៃ ៧០លានអឺរ៉ូ ជាមួយនឹងប្រាក់រង្វាន់សរុបបន្ថែម ១០លានអឺរ៉ូ ប្រសិនបើ Arsenal ចង់ធានាសេវាកម្មរបស់ខ្សែប្រយុទ្ធនៅរដូវក្តៅនេះ។
ក្លឹប Sporting មិនមានស្ថានភាពបន្ទាន់ក្នុងការលក់កីឡាករ Gyokeres ទេ ដោយសារស្ថានភាពហិរញ្ញវត្ថុដ៏រឹងមាំរបស់ពួកគេ។ ខ្សែប្រយុទ្ធវ័យ ២៦ឆ្នាំរូបនេះនៅតែមានកុងត្រាជាមួយក្លឹបដែលមានមូលដ្ឋាននៅទីក្រុង Lisbon សម្រាប់រយៈពេល ៣ឆ្នាំទៀត ដែលផ្តល់ឱ្យក្លឹបនូវអានុភាពច្រើនក្នុងការចរចាណាមួយ៕
