ពោធិ៍សាត់ ៖ ឯកឧត្តម ខូយ រីដា អភិបាលខេត្តពោធិ៍សាត់ បានដឹកនាំក្រុមការងារចុះពិនិត្យទីតាំង «ស្រះបាញ់ដង» ដែលជាស្រះប្រវត្តិសាស្ត្របូរាណមួយក្នុងតំបន់ឧទ្យានជាតិជួរភ្នំក្រវាញកណ្តាល នាព្រឹកថ្ងៃទី ៣១ ខែមីនា ឆ្នាំ ២០២៥។
ស្រះបាញ់ដង មានទំហំប្រមាណ ៧ ហិកតា មានលក្ខណៈជាស្រះទឹកមូល ដោយព័ទ្ធជុំវិញដោយព្រៃឈើធម្មជាតិ និងសម្បូរប្រភេទធនធានធម្មជាតិផ្សេងៗ។ តំបន់នេះស្ថិតក្នុងភូមិកណ្តាល ឃុំអូរសោម ស្រុកវាលវែង ខេត្តពោធិ៍សាត់ ដែលមានប្រជាជនជនជាតិដើមភាគតិចជងរស់នៅ។
ឯកឧត្តម អភិបាលខេត្តបានបង្ហាញទស្សនៈថា ស្រះបាញ់ដងអាចក្លាយជាគោលដៅទេសចរណ៍សំខាន់មួយក្នុងខេត្តពោធិ៍សាត់ នៅពេលអនាគត ដោយផ្តោតសំខាន់លើការអភិរក្សធនធានធម្មជាតិ និងការអភិវឌ្ឍវិស័យទេសចរណ៍សហគមន៍៕
